غزہ جنگ جاری رہی تو بھاری جانی نقصان ہوگا؛صیہونی فوج کے اعلیٰ افسر کا انتباہ 

سچ خبریں:صیہونی فوج کے سینئر جنرل اسحاق بریک نے خبردار کیا ہے کہ غزہ جنگ میں توسیع اسرائیل کو شدید نقصان پہنچا سکتی ہے،انہوں نے جنگ کو بے فائدہ قرار دیتے ہوئے فوری جنگ بندی کا مطالبہ کردیا۔

الجزیرہ نیوز چینل کی رپورٹ کے مطابق صیہونی فوج کے ایک سینئر جنرل اسحاق بریک نے حکومت کو خبردار کیا ہے کہ اگر غزہ میں جنگ جاری رہی تو اسرائیل کو بھاری جانی نقصان اٹھانا پڑ سکتا ہے۔

یہ بھی پڑھیں:اسرائیلی فوج کے ریزرو دستوں پر 2.3 ارب ڈالر کا بھاری بوجھ

رپورٹ کے مطابق جنرل اسحاق بریک، جو اسرائیلی فوج کے ریٹائرڈ اعلیٰ عہدیدار اور دفاعی امور کے ماہر ہیں، نے اسرائیلی پارلیمنٹ (کنیسٹ) کی خارجہ امور اور سیکیورٹی کمیٹی کے بعض ارکان کے خیالات کا حوالہ دیتے ہوئے کہا ہے کہ غزہ جنگ کو طول دینے سے اسرائیلی فوج کو شدید خطرات لاحق ہوسکتے ہیں۔

انہوں نے مزید کہا کہ فوجی کارروائی کے ذریعے غزہ میں اہداف حاصل کرنے کی کوشش اب تک بے اثر ثابت ہوئی ہے اور جنگ کو دوبارہ شروع کرنے سے نہ تو حماس کو کمزور کیا جاسکتا ہے اور نہ ہی اسرائیلی قیدیوں کی رہائی ممکن ہوگی۔

جنرل بریک نے واضح کیا کہ موجودہ صورتحال سے نکلنے کا واحد راستہ فوری طور پر جنگ بندی ہے اور ساتھ ہی تمام اسرائیلی قیدیوں کی ایک ساتھ اور فوری رہائی کو یقینی بنانا ہوگا۔ انہوں نے حکومت پر زور دیا کہ وہ جنگ بندی کے لئے سفارتی اقدامات کرے کیونکہ عسکری حل ناکام ہوچکا ہے اور اس کا تسلسل مزید نقصان دہ ہوگا۔

مزید پڑھیں:غزہ جنگ کی مساوات کو تبدیل کرنا؛ امریکہ حماس سے مذاکرات پر کیوں مجبور ہوا؟

یاد رہے کہ غزہ میں حالیہ کشیدگی کے باعث اب تک سینکڑوں افراد جاں بحق اور ہزاروں زخمی ہوچکے ہیں، جبکہ عالمی برادری بھی فوری جنگ بندی اور انسانی المیے کو روکنے کا مطالبہ کر رہی ہے۔