میں نے ابھی یوکرین جنگ کے خاتمے کے لیے تاریخ طے نہیں کی: ٹرمپ

سچ خبریں:امریکی صدر ڈونلڈ ٹرمپ نے انکشاف کیا ہے کہ روسی صدر ولادیمیر پیوٹن کے ساتھ ہونے والی بات چیت میں یوکرین جنگ کے خاتمے کے لیے کوئی حتمی تاریخ مقرر نہیں کی گئی۔ ان کا کہنا ہے کہ اگرچہ پیش رفت جاری ہے، لیکن جنگ ختم کرنے کے لیے ابھی بہت سے مراحل طے کرنا باقی ہیں۔

یہ بھی پڑھیں: پینٹاگون کی نظر میں یوکرین کی جنگ کیسے ختم ہوگی؟

قطری نشریاتی ادارے الجزیرہ کی رپورٹ کے مطابق، ٹرمپ نے ایک حالیہ بیان میں کہا کہ ہم یوکرین جنگ کے خاتمے کی جانب بڑھ رہے ہیں اور آج اس حوالے سے مفید گفتگو ہوئی ہے،انہوں نے امید ظاہر کی کہ ہم جلد ہی اس مہلک جنگ کو روکنے کے لیے راہ ہموار کر سکتے ہیں۔

ٹرمپ کا کہنا تھا کہ روسی صدر پیوٹن نے تاحال یوکرین کے ساتھ جنگ بندی کی پیشکش کو مسترد نہیں کیا، جو ممکنہ طور پر مذاکرات کے دروازے کھلے ہونے کی علامت ہے۔

انہوں نے مزید کہا کہ روس پر عائد پابندیاں دنیا کی کسی بھی دوسری قوم پر عائد کردہ پابندیوں سے کہیں زیادہ سخت ہیں، اور ان پابندیوں میں ممکنہ نرمی کا عندیہ بھی دیا۔

سیاسی مبصرین کا کہنا ہے کہ ٹرمپ کے حالیہ بیانات ایک طرف جنگ بندی کی امید پیدا کرتے ہیں، تو دوسری جانب یہ اشارہ بھی دیتے ہیں کہ وہ اپنے دوسرے صدارتی دور میں روس کے ساتھ تعلقات بحال کرنے کی کوشش کریں گے۔

مزید پڑھیں: یوکرین میں جنگ کا خاتمہ ہونا چاہیئے: جرمن

یاد رہے کہ ڈونلڈ ٹرمپ کئی بار اس بات کا دعویٰ کر چکے ہیں کہ اگر وہ صدر ہوتے تو یوکرین جنگ کبھی شروع نہ ہوتی، اور وہ جلد از جلد روس اور یوکرین کے درمیان امن قائم کروا سکتے ہیں۔