صیہونیوں نے غزہ میں کتنی مساجد شہید کی ہیں؟

سچ خبریں:فلسطین کی وزارت اوقاف نے انکشاف کیا ہے کہ صیہونی ریاست کے حالیہ وحشیانہ حملوں کے دوران غزہ میں قریباً ایک ہزار مساجد کو نشانہ بنایا گیا ہے، جن میں سے سینکڑوں مکمل طور پر تباہ ہو چکی ہیں، جبکہ متعدد دیگر کو شدید نقصان پہنچا ہے۔

وزارت کے جاری کردہ بیان کے مطابق، اسرائیل کی جانب سے 7 اکتوبر 2023 سے شروع ہونے والی جنگ کے بعد اب تک کم از کم 814 مساجد مکمل طور پر تباہ ہو چکی ہیں۔ ان حملوں میں نہ صرف عبادت گاہوں کو مسمار کیا گیا بلکہ ان کے ساتھ واقع مذہبی و تعلیمی مراکز، کتب خانے، حفظِ قرآن کے مراکز اور اسلامی ثقافت کے اہم ترین آثار بھی خاکستر ہو چکے ہیں۔

یہ بھی پڑھیں:صہیونیوں نے غزہ کی تاریخی یادگاروں کے ساتھ کیا کیا ؟

اس کے علاوہ، 148 دیگر مساجد کو جزوی نقصان پہنچا ہے، جن کی چھتیں، دیواریں یا اندرونی ڈھانچے تباہ ہو چکے ہیں۔ ان حملوں کے نتیجے میں ہزاروں نمازی، علماء اور طلبہ بھی متاثر ہوئے ہیں، جبکہ کئی لوگ دورانِ عبادت یا مسجد کے احاطے میں شہید ہو چکے ہیں۔

ان مساجد میں غزہ کی نمایاں عبادت گاہیں شامل ہیں جیسے:

 مسجد الفاروق

 مسجد العوده

 مسجد الطبیه

 مسجد العمری

یہ مساجد غزہ کی دینی، سماجی اور ثقافتی زندگی کا مرکز سمجھی جاتی تھیں۔ ان کے انہدام کو نہ صرف انسانی حقوق کی خلاف ورزی بلکہ اسلامی ورثے پر حملہ قرار دیا جا رہا ہے۔

فلسطینی مذہبی اور سماجی حلقوں نے اقوامِ متحدہ، او آئی سی اور عالمی انسانی حقوق کے اداروں سے مطالبہ کیا ہے کہ وہ اسرائیل کے ان اقدامات کی فوری تحقیقات کریں اور اس مذہبی نسل کشی کو روکا جائے۔ ماہرین کا کہنا ہے کہ مساجد کو دانستہ نشانہ بنانا بین الاقوامی قوانین، خاص طور پر جنیوا کنونشن، کی کھلی خلاف ورزی ہے۔

مزید پڑھیں:غزہ میں قرآن اور مساجد کی بے حرمتی

اسرائیلی حملوں کے نتیجے میں مسجدوں کی تباہی نے غزہ کی روحانی اور مذہبی فضا کو گہرا زخم پہنچایا ہے، جہاں نمازیوں کے لیے اب عبادت کی جگہیں باقی نہیں رہیں۔