جاپان میں پندرہویں صدی کے تاریخی معبد میں خوفناک آتشزدگی

?️ 17 مئی 2026

سچ خبریں:جاپان کے شہر تاکاؤکا میں واقع 1453ء کے تاریخی دایگوجی معبد میں شدید آتشزدگی سے مرکزی لکڑی کا ہال تباہ ہو گیا، فائر بریگیڈ کی کئی گھنٹوں کی کوششوں کے بعد آگ پر قابو پایا گیا۔

جاپان میں پندرہویں صدی سے تعلق رکھنے والی ایک تاریخی بدھ مت عبادتگاہ شدید آتشزدگی کی لپیٹ میں آ کر تباہ ہو گئی۔

ریانووستی نیوز ایجنسی کی رپورٹ جاپان کے شہر تاکاؤکا میں واقع دایگوجی عبادتگاہ میں اچانک آگ بھڑک اٹھی جس نے دیکھتے ہی دیکھتے پوری عمارت کو اپنی لپیٹ میں لے لیا۔

جاپانی سرکاری ٹی وی چینل این ایچ کے کے مطابق واقعے کے فوراً بعد تقریباً 20 فائر بریگیڈ یونٹس کو جائے حادثہ پر بھیجا گیا۔ مقامی میڈیا کا کہنا ہے کہ آگ پر رات تقریباً 10 بج کر 20 منٹ پر قابو پا لیا گیا، تاہم مکمل طور پر شعلے بجھانے کا عمل صبح 3 بجے تک جاری رہا۔

رپورٹس کے مطابق 1453ء میں تعمیر ہونے والی یہ عبادتگاہ مکمل طور پر جل کر خاکستر ہو گیا۔ عبادتگاہ کا مرکزی لکڑی کا ہال شدید آگ کی وجہ سے مکمل طور پر تباہ ہو گیا جبکہ آگ قریبی نمائشی مرکز اور ایک خالی رہائشی مکان تک بھی پھیل گئی۔

میڈیا رپورٹس کے مطابق عبادتگاہ کے احاطے میں رہنے والے دو خاندانوں کو بروقت محفوظ مقام پر منتقل کر دیا گیا اور کسی جانی نقصان کی اطلاع نہیں ملی۔

مقامی گائیڈز کے مطابق اس تاریخی عبادتگاہ میں سولہویں صدی کے بدھ مت سے متعلق نایاب طومار موجود تھے جو مشہور جاپانی فنکار ہاسےگاوا توہاکو سے منسوب کیے جاتے ہیں۔ تاہم ان قیمتی تاریخی نوادرات کی موجودہ حالت کے بارے میں تاحال کوئی حتمی معلومات سامنے نہیں آئی ہیں۔

حکام نے واقعے کی تحقیقات شروع کر دی ہیں تاکہ آگ لگنے کی وجوہات کا تعین کیا جا سکے۔