جنگ بندی میں صیہونی رکاوٹوں پر حماس کا ردعمل

سچ خبریں:فلسطینی مزاحمتی تحریک حماس نے اسرائیلی وزیر اعظم بنیامین نیتن یاہو کی جانب سے غزہ میں جنگ بندی کے دوسرے مرحلے کے آغاز میں نئی رکاوٹیں کھڑی کرنے کی شدید مخالفت کی ہے۔  

الجزیرہ نیوز چینل کی رپورٹ کے مطابق صیہونی وزیر اعظم بنیامین نیتن یاہو کے دفتر نے اعلان کیا ہے کہ تل ابیب، امریکی ایلچی اسٹیو وٹکاف کے اس منصوبے سے اتفاق کرے گا، جس کے تحت رمضان المبارک کے دوران جنگ بندی کے پہلے مرحلے کو اس شرط پر بڑھایا جا سکتا ہے کہ حماس نصف اسرائیلی قیدیوں کو رہا کرے۔

یہ بھی پڑھیں:قیدیوں کے تبادلے کے دوسرے مرحلے کے بارے میں صیہونی باشندوں کا اظہار خیال

حماس کے سینئر رہنما محمود مرداوی نے اس اسرائیلی منصوبے کو مسترد کرتے ہوئے کہا کہ یہ واضح ہو چکا ہے کہ صیہونی حکومت مسلسل ایسے معاہدوں سے فرار کا راستہ اختیار کر رہی ہے جن پر خود دستخط کیے تھے، وہ جنگ بندی کے نفاذ میں فریبکاری کی پالیسی پر عمل پیرا ہیں اور اپنے وعدے پورے کرنے سے انکاری ہیں۔

انہوں نے مزید کہا کہ اسرائیل کی یہ چالیں قیدیوں کی رہائی کو ممکن نہیں بنائیں گی بلکہ اگر قابض حکومت پر دباؤ نہ ڈالا گیا تو اسرائیلی قیدیوں کی مشکلات اور خطرات مزید بڑھ جائیں گے۔

محمود مرداوی نے اس بات پر زور دیا کہ جنگ بندی کے نفاذ کے لیے اسرائیل پر دباؤ برقرار رہنا چاہیے اور مذاکرات کے اگلے مرحلے میں مستقل جنگ بندی، اسرائیلی فوج کا غزہ سے مکمل انخلا، علاقے کی تعمیر نو اور فلسطینی قیدیوں کی رہائی جیسے بنیادی نکات شامل کیے جائیں۔

مزید پڑھیں: قیدیوں کے تبادلے کے دوسرے مرحلے کی تازی ترین صورتحال

انہوں نے واضح کیا کہ حماس اپنی شرائط سے پیچھے نہیں ہٹے گی اور اسرائیلی چالوں کو کامیاب نہیں ہونے دے گی۔