حماس کا ثالثوں سے اسرائیلی جرائم کو روکنے کے لیے فوری مداخلت کا مطالبہ  

سچ خبریں:فلسطینی مزاحمتی تحریک حماس نے غزہ میں جاری صیہونی مظالم کی مذمت کرتے ہوئے ثالثی کرنے والے ممالک اور جنگ بندی کے ضامن فریقوں سے مطالبہ کیا ہے کہ وہ اسرائیل کی مسلسل جارحیت کو روکنے کے لیے فوری مداخلت کریں۔  

یہ بھی پڑھیں: مصر کا شام کے خلاف صیہونی جارحیت پر عالمی برادری سے مطالبہ

الجزیرہ نیوز چینل کی رپورٹ کے مطابق، حماس نے اپنے بیان میں کہا کہ صیہونی دشمن جنگ بندی معاہدے کی کھلی خلاف ورزی کرتے ہوئے معصوم شہریوں کو نشانہ بنا رہا ہے۔ تازہ ترین اسرائیلی ڈرون حملے میں غزہ کے وسطی علاقے میں پانچ بے گناہ فلسطینی شہید ہوئے، جس کے بعد جنگ بندی کے اعلان کے بعد شہید ہونے والوں کی تعداد 160 تک پہنچ گئی ہے۔

حماس نے مزید کہا کہ اسرائیل غزہ کی گزرگاہوں کو بند رکھ کر اور دو ملین سے زائد فلسطینیوں پر بھوک اور پیاس مسلط کر کے انسانی حقوق کی خلاف ورزی کر رہا ہے،یہ تمام اقدامات نتنیاہو کی دہشت گرد کابینہ کی جانب سے جنگ بندی معاہدے سے راہ فرار اختیار کرنے کا واضح ثبوت ہیں۔

اسرائیل نہ صرف عالمی قوانین اور انسانی حقوق کو نظرانداز کر رہا ہے بلکہ اپنے زیر حراست فوجیوں کی زندگی کی بھی پرواہ نہیں کر رہا۔

حماس نے عالمی برادری اور ثالثی کرنے والے ممالک کو مخاطب کرتے ہوئے کہا کہ ہم ثالثی کرنے والے فریقوں سے مطالبہ کرتے ہیں کہ وہ اسرائیلی مظالم کو روکنے کے لیے فوری مداخلت کریں اور عالمی برادری سے اپیل کرتے ہیں کہ وہ غزہ کے محاصرے کے خاتمے اور فلسطینیوں کے خلاف اسرائیلی فاشزم کو روکنے کے لیے مؤثر اقدامات کرے۔

مزید پڑھیں:صیہونی جارحیت کو روکنے کے لیے اسلامی ممالک کے درمیان اتفاق رائے کی ضرورت

یہ بیان ایسے وقت میں سامنے آیا ہے جب اسرائیل غزہ میں جنگ بندی معاہدے کے باوجود مسلسل حملے کر رہا ہے اور محاصرہ سخت کر کے بنیادی انسانی حقوق کو پامال کر رہا ہے۔