شدید گرمی اور سکیورٹی تدابیر میں مناسک حج کا آغاز

?️ 5 جون 2025

سچ خبریں:2025 کے حج کا آغاز مکہ مکرمہ میں سخت سیکیورٹی اور گرمی سے بچاؤ کے خصوصی انتظامات کے ساتھ ہوا، سعودی حکام نے 52 ڈگری گرمی سے نمٹنے کے لیے AI ٹیکنالوجی، کولر، سائے اور 400 سے زائد خنک کنندہ آلات نصب کیے۔

المیادین نیوز چینل کی رپورٹ کے مطابق، حج تمتع 2025 کا آغاز مکہ مکرمہ میں سخت سکیورٹی اور شدید گرمی کے سائے میں ہو چکا ہے، جہاں دنیا بھر سے آئے ہوئے ڈیڑھ ملین سے زائد عازمین حج مناسکِ حج ادا کر رہے ہیں۔

یہ بھی پڑھیں:عازمین کی روانگی کیلئے حج پروازوں کے دوسرے مرحلے کا آغاز

اس سال درجہ حرارت 52 ڈگری تک پہنچ گیا ہے، جس کے پیشِ نظر سعودی حکام نے گرمی سے بچاؤ کے لیے سخت انتظامات کیے ہیں، یاد رہے کہ گزشتہ سال گرمی کے باعث 1301 حجاج جاں بحق ہو گئے تھے۔

سعودی عرب نے اعلان کیا ہے کہ ڈھائی لاکھ سے زائد اہلکاروں کو تعینات کیا گیا ہے، جو 40 سے زائد سرکاری اداروں کے باہمی تعاون سے کام کر رہے ہیں تاکہ گرمی کی شدت سے حجاج کو محفوظ رکھا جا سکے۔

ان علاقوں میں جہاں حج کے مناسک انجام دیے جاتے ہیں، 50 ہزار مربع میٹر اضافی سایہ دار جگہ کا بندوبست کیا گیا ہے۔

حجاج کی سہولت کے لیے 400 کولنگ یونٹس نصب کیے گئے ہیں تاکہ درجہ حرارت میں کمی لائی جا سکے۔

مسجد الحرام میں نصب ایئرکنڈیشننگ سسٹم دنیا کا سب سے بڑا بتایا جا رہا ہے، جو روزانہ 9 مرتبہ ہوا کی مکمل گردش کرتا ہے۔

حکام کے مطابق، عرفات جانے والے 4 کلومیٹر طویل راستے میں کولر یونٹس نصب کیے گئے ہیں تاکہ حجاج کو سہولت فراہم کی جا سکے۔

سعودی حکام نے اعلان کیا ہے کہ مصنوعی ذہانت (AI) کی مدد سے حجاج کے ہجوم کی نگرانی کی جا رہی ہے۔ لائیو ڈیٹا اور ویڈیو فیڈز کی بنیاد پر حجاج کے اجتماع کو مؤثر انداز میں منظم کیا جا رہا ہے۔

مزید پڑھیں:عازمین حج کے لیے سعودی عرب کی ہدایات 

حج 2025 کا آغاز ایسے وقت میں ہوا ہے جب شدید موسمی حالات اور صحت کے خطرات کے باوجود، لاکھوں مسلمان ایمان، ایثار اور قربانی کے جذبے سے سرشار ہو کر حج کی ادائیگی کے لیے جمع ہوئے ہیں۔ سعودی حکومت کی جانب سے سیکیورٹی، صحت اور تکنیکی انتظامات اس مقدس فریضے کو محفوظ بنانے کے لیے بھرپور کوششوں کا مظہر ہیں۔