غزہ کے رہائشی اگر بمباری سے نہ مریں تو بھوک سے مر جائیں گے

سچ خبریں:غزہ میں صیہونی بمباری کے بعد سینکڑوں خاندان لاپتہ ہوچکے ہیں جبکہ بمباری سے نہ مرنے والے شہری اب بھوک سے جان دے رہے ہیں، اسپتال العودہ بھی حملوں سے متاثر، لیکن طبی عملہ خدمت جاری رکھنے کے لیے پرعزم ہے۔

الجزیرہ نیوز چینل کی رپورٹ کے مطابق غزہ پٹی میں دفاع مدنی کے ترجمان نے خبردار کیا ہے کہ اگر اس علاقے کے شہری صیہونی فضائی حملوں میں شہید نہ بھی ہوں، تو وہ شدید بھوک اور غذائی قلت کے باعث اپنی جانوں سے ہاتھ دھو رہے ہیں۔

یہ بھی پڑھیں:صیہونی سیکورٹی ذرائع کا دعویٰ: دو ہفتوں میں غزہ میں انسانی امداد پہنچ جائے گی

رپورٹ کے مطابق، غزہ کے دفاع مدنی کے ترجمان نے کہا ہے کہ اسرائیلی افواج کے وحشیانہ حملوں کے بعد غزہ پٹی کے رجسٹرڈ شہریوں میں سے سینکڑوں فلسطینی خاندانوں کے نام رجسٹریشن سے حذف کر دیے گئے ہیں۔

اس مقامی عہدیدار کے مطابق، صہیونی افواج کی جانب سے مختلف علاقوں پر حالیہ شدید بمباری کے نتیجے میں اب بھی 200 سے زائد افراد ملبے تلے دبے ہوئے ہیں، جن تک رسائی ممکن نہیں ہو سکی۔

دفاع مدنی کے ترجمان نے ایک بار پھر خبردار کیا کہ جن لوگوں کو اسرائیلی حملوں میں شہادت نصیب نہیں ہوئی، وہ اب بھوک اور خوراک کی شدید کمی کے باعث جاں بحق ہو رہے ہیں۔

مزید پڑھیں:غزہ میں نئے امدادی طریقہ کار کے لیے تل ابیب کے کیا مقاصد ہیں؟

یہ صورتحال ایسے وقت میں سامنے آئی ہے جب غزہ کے العودہ اسپتال کے سربراہ محمد صالحہ نے اعلان کیا ہے کہ اسپتال کو اسرائیلی افواج کے دس فضائی حملوں کے سبب شدید نقصان پہنچا ہے،اس کے باوجود اسپتال کو خالی کرنے کا کوئی ارادہ نہیں اور طبی عملہ مریضوں اور زخمیوں کی خدمت جاری رکھے گا۔