بنگلادیش میں خوفناک حادثہ، درجنوں افراد ہلاک ہوگئے

6 اپریل 2021

ڈھاکا (سچ خبریں) بنگلادیش میں جہاز اور کشتی کے مابین خوفناک تصادم ہوگیا جس کے نتیجے میں درجنوں افراد ہلاک ہوگئے ہیں جن میں سے ابھی تک 27 افراد کی لاشیں نکال لی گئی ہیں جبکہ درجنوں افراد ابھی بھی لاپتا ہیں جن کی تلاش جاری ہے۔

تفصیلات کے مطابق دریائے شیتا لکھیا میں مال بردار جہاز نے ایک چھوٹی کشتی کو پیچھے سے ٹکر مار ی، جس میں 50 افراد سوار تھے جن میں سے ابھی تک 27 افراد کی لاشیں مل چکی ہیں جبکہ باقی افراد کی تلاش جاری ہے۔

مقامی حکام کا کہنا ہے کہ حادثے کے فوراً بعد امدادی کارروائی شروع کردی گئی اور اس دوران 27 لاشوں کو نکال لیا گیا ہے جبکہ دیگر لاپتا مسافروں کی تلاش جاری ہے۔

بنگلادیش کے واٹر ٹرانسپورٹ اتھارٹی کے عہدے دار مبارک حسین نے بتایا کہ واقعہ ڈھاکاکے پاس ہی دریائے شیتا لکھیا میں پیش آیا، ڈوبنے والی کشتی ناریان گنج سے پڑوسی ضلع منشی گنج جارہی تھی، حادثے کے بعد سمندر میں طوفان کے آثار نمودار ہوگئے، جس کے باعث امدادی کارروائیوں میں شدید دشواری کا سامنا کرنا پڑا۔

امدادی ٹیموں نے 11 افراد کو بحفاظت نکال کر اسپتال منتقل کردیا گیا ہے، جبکہ غوطہ خور لاپتا ہونے والے افراد کی تلاش میں مصروف ہیں۔

مقامی ذرائع ابلاغ کے مطابق حادثے کی تحقیقات شروع کردی گئی ہے، حکومت نے کورونا وائرس کے پھیلاؤ کے پیش نظر پیر کے روز سے ملکی سطح پر ایک ہفتے کے لاک ڈاؤن کا اعلان کیا تھا۔

خبر سامنے آتے ہی صنعتی شہر میں کام کرنے والے لوگ بڑی تعداد میں اپنے گھرں کی طرف نکل پڑے، یہی وجہ تھی کہ حادثے کاشکار ہونے والی چھوٹی سی کشتی پر بھی گنجایش سے زیادہ مسافر سوار تھے۔

واضح رہے کہ بنگلادیشی حکام نے 7روز ہ لاک ڈاؤن کے دوران طیاروں کی آمد و رفت سمیت دکانیں بند کرنے کا حکم دیا ہے۔