صیہونیوں پوپ فرانسس سے مرنے کے بعد بدلہ 

سچ خبریں:صہیونی حکومت کی وزارتِ خارجہ نے پوپ فرانسس کی وفات پر سوشل میڈیا پلیٹ فارم ایکس (سابقہ ٹوئٹر) پر کی گئی تعزیتی پوسٹ کو اچانک حذف کر دیا، اور بعد ازاں وضاحت دی کہ یہ پیغام غلطی سے جاری کیا گیا تھا۔

فلسطینی خبر رساں ادارے معا کی رپورٹ کے مطابق، یہ واقعہ اس وقت پیش آیا جب صہیونی وزارتِ خارجہ نے کیتھولک دنیا کے رہنما پوپ فرانسس کی مبینہ وفات پر تعزیتی پیغام شیئر کیا، تاہم جلد ہی اسے واپس لے لیا گیا۔

یہ بھی پڑھیں: پوپ نے غزہ میں صیہونی حکومت کی جارحیت کو دہشت گردانہ کارروائی قرار دیا

روزنامہ یروشلم پوسٹ کے مطابق، صہیونی وزارتِ خارجہ نے یہ فیصلہ اس لیے کیا کیونکہ پاپ فرانسس نے ماضی میں اسرائیل کی غزہ پر بمباری اور شہری ہلاکتوں پر شدید تنقید کی تھی، جو صہیونی حلقوں کو ناگوار گزری تھی۔

اسی تناظر میں، صہیونی وزارتِ خارجہ نے نہ صرف پوسٹ حذف کی، بلکہ دنیا بھر میں موجود اپنی تمام سفارتی مشنز کو بھی ہدایت جاری کی کہ وہ اس حوالے سے کی گئی تمام پوسٹس کو فوری طور پر ہٹا دیں۔

سابق اسرائیلی سفیر برائے اٹلی نے بھی اس معاملے پر شدید ردِعمل کا اظہار کرتے ہوئے کہا کہ تل آویو کو پوپ فرانسس کی آخری رسومات میں شرکت کے لیے کوئی نمائندہ نہیں بھیجنا چاہیے، کیونکہ وہ ‘یہود مخالف’ تھے،یہ بیان دراصل پوپ فرانسس کے ان بیانات کا جواب تھا جن میں انہوں نے اسرائیلی حملوں کے نتیجے میں فلسطینی شہریوں کی شہادت کو انسانی المیہ قرار دیا تھا۔

مزید پڑھیں: دینی رہبروں کو فلسطنیوں پر ہونے والے ظلم کے خلاف آگے آنا چاہیے؛پوپ فرانسس اور آیت اللہ سیستانی کی ملاقات کے بعد بیانیہ

تجزیہ کاروں کا ماننا ہے کہ صہیونی حکومت نے یہ تعزیتی پیغام صرف سفارتی آداب کی تکمیل کے لیے جاری کیا تھا، لیکن اندرونی مخالفت اور انتہا پسند صہیونی حلقوں کی ممکنہ تنقید کے خوف سے پیچھے ہٹ گئی۔

یہ واقعہ ایک بار پھر اسرائیل کی داخلی سیاسی کشمکش اور اس کے بین الاقوامی تعلقات میں تضاد کو نمایاں کرتا ہے۔