چین کا امریکہ کو دو ٹوک جواب

چین نے امریکہ کے ساتھ تجارتی مذاکرات کی خبروں کو سختی سے مسترد کرتے ہوئے واضح کیا ہے کہ موجودہ صورتحال کا ذمہ دار خود واشنگٹن ہے اور اسی کو اس مسئلے کو حل کرنا ہوگا۔

یہ بھی پڑھیں:ٹرمپ اور دنیا کے ساتھ تجارتی جنگ؛ اہداف اور نتائج

شینہوا نیوز ایجنسی کی رپورٹ کے مطابق، چین کے سفارت خانے کے ترجمان نے واشنگٹن میں جاری اپنے بیان میں کہا کہ چین اور امریکہ کے درمیان تجارتی محصولات کے حوالے سے کسی قسم کی مشاورت یا مذاکرات نہیں ہو رہے۔

چینی سفارتکار نے امریکی حکام کے ان دعوؤں پر شدید تنقید کی کہ دونوں ممالک کے درمیان مذاکرات ہو رہے ہیں، انہوں نے کہا کہ جہاں تک میں جانتا ہوں، چین اور امریکہ کے درمیان محصولات کے معاملے پر کوئی مشاورت یا گفت و شنید نہیں ہوئی، چہ جائیکہ کوئی معاہدہ طے پایا ہو!

ترجمان نے زور دیتے ہوئے کہا کہ امریکہ نے یکطرفہ طور پر تجارتی محصولات کی جنگ چھیڑی ہے، اور اب یہ واشنگٹن کی ذمہ داری ہے کہ وہ اس خود پیدا کردہ بحران کو حل کرے،انہوں نے مزید کہا کہ جس نے یہ گرہ لگائی ہے، اسی کو کھولنا ہوگا۔

یہ بیان ایسے وقت سامنے آیا ہے جب امریکی صدر ڈونلڈ ٹرمپ نے حال ہی میں دعویٰ کیا تھا کہ امریکہ اور چین کے درمیان تجارتی مذاکرات جاری ہیں،ٹرمپ نے اپنے بیان میں کہا تھا کہ اہم نہیں کہ مذاکرات کرنے والے کون ہیں، شاید ہم بعد میں بتائیں، لیکن آج صبح (جمعرات) ایک ملاقات ہوئی تھی اور ہم چین کے ساتھ مذاکرات کر رہے ہیں۔

یاد رہے کہ ڈونلڈ ٹرمپ نے چینی درآمدات پر بھاری محصولات عائد کر کے دونوں ممالک کے درمیان تجارتی کشمکش کو جنم دیا تھا،اس کے جواب میں بیجنگ نے بھی امریکی مصنوعات پر جوابی محصولات عائد کر دیے تھے، جس کے نتیجے میں دونوں ممالک ایک سخت تجارتی جنگ میں مبتلا ہو چکے ہیں۔

موجودہ صورتحال کے مطابق، امریکہ نے چینی مصنوعات پر محصولات کی شرح 145 فیصد تک بڑھا دی ہے جبکہ چین نے بھی امریکی مصنوعات پر 125 فیصد تک محصولات نافذ کر دیے ہیں۔

مزید پڑھیں:ٹرمپ کے نئے ٹیکسز پر عالمی ردعمل؛ تجارتی جنگ کا خدشہ

یہ تجارتی جنگ، جسے ٹرمپ چین کی غیرمنصفانہ تجارتی پالیسیوں کا جواب قرار دیتے ہیں، عالمی منڈیوں پر بھی منفی اثرات ڈال رہی ہے اور اقتصادی عدم استحکام میں اضافہ کر رہی ہے۔