بریکس کا ٹرمپ کی تجارتی دھمکیوں کے خلاف مشترکہ حکمت عملی پر غور

سچ خبریں:بریکس ممالک کے اعلیٰ سفارتکار برزیل میں جمع ہوئے تاکہ امریکی صدر ڈونلڈ ٹرمپ کی تجارتی دھمکیوں کے مقابلے میں مشترکہ مؤقف اپنانے پر تبادلہ خیال کر سکیں، یہ اجلاس عالمی اقتصادی بحران کے تناظر میں ہو رہا ہے۔

فرانس 24 کی رپورٹ کے مطابق، بریکس ممالک کے اعلیٰ سفارتکار آج (پیر) برزیل میں ایک اہم اجلاس میں شریک ہو رہے ہیں تاکہ امریکی صدر ڈونلڈ ٹرمپ کی جانب سے بڑھتی ہوئی تجارتی دھمکیوں کے مقابلے میں ایک متحدہ حکمت عملی اختیار کی جا سکے۔

یہ بھی پڑھیں: بریکس کا امریکی ڈالر سے چھٹکارا پانے کا منصوبہ

یہ ملاقات ایسے وقت ہو رہی ہے جب ٹرمپ نے دنیا بھر کے ممالک، جن میں اکثریت امریکہ کے شراکت داروں کی ہے، کے خلاف تجارتی جنگ کا آغاز کر رکھا ہے۔

عالمی مالیاتی فنڈ (IMF) نے اس ہفتے خبردار کیا ہے کہ امریکہ کی جانب سے عائد کیے گئے نئے اور وسیع تجارتی محصولات عالمی معیشت کی ترقی پر منفی اثر ڈال رہے ہیں، جس کے بعد عالمی معیشت کی شرح نمو کی پیشگوئی کم کر دی گئی ہے۔ ایسے حساس وقت میں بریکس اجلاس کا انعقاد کیا جا رہا ہے۔

برزیل، جو اس وقت بریکس کی صدارت سنبھالے ہوئے ہے، کے دارالحکومت ریودو جینیرو میں برزیل، روس، بھارت، چین اور جنوبی افریقہ کے اعلیٰ سفارتکار دو روزہ اجلاس کے لیے جمع ہوئے ہیں۔ اس گروپ کے سربراہان ریاست آئندہ جولائی میں ایک علیحدہ سربراہی اجلاس میں ملاقات کریں گے۔

بریکس میں برزیل کے نمائندے موریسیو لیریو نے کہا کہ وزرائے خارجہ ایک ایسے مشترکہ مؤقف پر بات چیت کر رہے ہیں جس سے کثیرالجہتی تجارتی ڈھانچے کی مرکزیت اور اہمیت کو اجاگر کیا جا سکے۔

یاد رہے کہ بریکس نے اپنی 2009ء میں تاسیس کے بعد سے نمایاں ترقی کی ہے اور اب ایران، مصر اور متحدہ عرب امارات جیسے ممالک بھی اس میں شامل ہو چکے ہیں۔ یہ گروپ دنیا کی نصف سے زائد آبادی اور 39 فیصد عالمی جی ڈی پی کی نمائندگی کرتا ہے۔

رپورٹ کے مطابق، جنوری 2025ء میں وائٹ ہاؤس واپسی کے بعد سے ڈونلڈ ٹرمپ نے درجنوں ممالک پر 10 فیصد بنیادی محصولات عائد کی ہیں، جبکہ چین کے خلاف خاص طور پر 145 فیصد تک کے بھاری محصولات نافذ کیے ہیں۔ اس کے جواب میں چین نے امریکی مصنوعات پر 125 فیصد تک کے جوابی محصولات لگا دیے ہیں۔

مزید پڑھیں: 9 ممالک بریکس میں شمولیت کے لیے تیار؛روس کا اعلان

ٹرمپ نے بریکس ممالک کو بھی خبردار کیا ہے کہ اگر انہوں نے امریکی ڈالر کی قدر کو گرانے کی کوشش کی تو انہیں 100 فیصد تجارتی محصولات کا سامنا کرنا پڑے گا۔