امریکی تہذیب زوال کا شکار؛ امریکی تجزیہ کار

?️ 1 فروری 2026

سچ خبریں:امریکی تجزیہ کار فرید زکریا نے خبردار کیا ہے کہ ٹرمپ انتظامیہ کی پالیسیاں شہری حقوق، عدالتی خودمختاری اور نجی ملکیت کی حرمت کو کمزور کر رہی ہیں، جس سے امریکہ میں حقیقی تہذیبی زوال جنم لے رہا ہے۔

الجزیرہ نیوز چینل کی رپورٹ کے مطابق امریکی قلمکار اور تجزیہ نگار فرید زکریا نے کہا ہے کہ امریکہ کی جانب سے اپنی بالادستی کو عوام کے کندھوں پر مسلط کرنے کی کوششیں اس ملک کی تہذیب کے حقیقی انہدام کا سبب بن رہی ہیں۔

یہ بھی پڑھیں:امریکی قومی سلامتی کی حکمتِ عملی 2025 امریکہ کی عالمی برتری کے خاتمے کا باضابطہ آغاز

رپورٹ کے مطابق، فرید زکریا نے واشنگٹن پوسٹ میں شائع ہونے والے اپنے ایک تجزیے میں لکھا ہے کہ ٹرمپ حکومت کی موجودہ پالیسیاں شہری حقوق کے استحکام، عدلیہ کی خودمختاری اور نجی ملکیت کی حرمت جیسے بنیادی اصولوں کو ختم کر رہی ہیں، جو جمہوریت، معاشی خوشحالی اور داخلی استحکام کے قیام کی بنیاد سمجھے جاتے ہیں۔

زکریا نے ان پالیسیوں کی متعدد مثالیں پیش کرتے ہوئے منیاپولس شہر میں دو افراد کی ہلاکت کا ذکر کیا، جو امریکی آئین کی پہلی ترمیم کے تحت اپنے حقوق کا مطالبہ کر رہے تھے، انہوں نے عدالتی حکم کے بغیر شہریوں کی گرفتاریوں کو بھی ریاستی جبر اور غیر محدود سرکاری طاقت کی واضح علامت قرار دیا۔

ان کے مطابق مغربی اقدار کے کمزور ہونے کی ایک اور بڑی علامت وہ جنگ ہے جو ٹرمپ حکومت نے سول سوسائٹی، میڈیا، جامعات، غیر سرکاری تنظیموں، وکلا کے دفاتر حتیٰ کہ نجی کمپنیوں کے خلاف چھیڑ رکھی ہے۔

زکریا کا کہنا ہے کہ معاشی میدان میں بھی امریکی حکومت اپنی بالادستی بڑھا رہی ہے، جہاں کاروباری فیصلے ایک ایسے ماڈل کے تحت کیے جا رہے ہیں جس میں کمپنیوں کے سربراہان کو سزا یا انعام کے لیے وائٹ ہاؤس طلب کیا جاتا ہے۔ ان کے بقول اس طرزِ عمل کے نتیجے میں سرمایہ دارانہ نظام ایک مسابقتی ڈھانچے کے بجائے اقربا پروری سے مشابہ نظام میں تبدیل ہو رہا ہے۔

انہوں نے ایک بار پھر ٹرمپ انتظامیہ پر تنقید کرتے ہوئے واضح کیا کہ مغربی تہذیب کی بنیاد کسی نسلی برتری پر نہیں بلکہ ریاستی طاقت کی حد بندی اور شہریوں کے محفوظ حقوق پر قائم ہے۔

مزید پڑھیں:امریکی قومی سلامتی کی نئی حکمت عملی میں دنیا کو کیسے دیکھا گیا ہے؟

فرید زکریا نے زور دے کر کہا کہ مغرب کے لیے سب سے بڑا خطرہ ٹرمپ حکومت کے تحت ریاستی طاقت کا پھیلاؤ ہے، اور امریکہ میں ایک حقیقی تہذیبی زوال جنم لے چکا ہے، جس کے تحت ریاست بتدریج عوام پر اپنی غیر محدود طاقت مسلط کر رہی ہے۔