تاجکستان میں شدید زلزلہ، متعدد افراد ہلاک اور زخمی ہوگئے

?️ 11 جولائی 2021

دوشنبہ (سچ خبریں)  تاجکستان کے رشت ضلع سے 27کلومیٹر مشرق میں شدید زلزلہ آیا ہے جس کے نتیجے میں متعدد افراد ہلاک اور زخمی ہوگئے ہیں جبکہ بڑے پیمانے پر تباہی مچ گئی ہے۔

تفصیلات کے مطابق تاجکستان میں 5.9 شدت کے زلزلے نے وسیع پیمانے پر تباہی مچادی ہے اور زلزلے کے جھٹکوں سے منہدم ہونے والی عمارتوں تلے دبنے سے 5 افراد ہلاک اور کئی زخمی ہوگئے۔

تاجکستان کے مشرقی ضلع راشت میں 5.9 شدت کا زلزلہ رونما ہوا، زلزلے کا مرکز 165 کلومیٹر جنوب مغرب میں دارالحکومت دوشنبہ میں تھا جس کی گہرائی دو کلومیٹر تھی، زلزلے کے اثر سے درجنوں مکانات زمین بوس ہوگئے اور کئی علاقوں میں بجلی کا نظام درہم برہم ہوگیا۔

مکانات کے ملبے سے 5 افراد کی لاشیں نکالی گئی ہیں، جب کہ اسپتالوں میں ایمرجنسی نافذ کردی گئی۔

موصولہ اطلاعات کے مطابق امدادی ٹیموں نے ملبے تلے دبے زخمیوں کو قریبی اسپتالوں میں منتقل کیا، جب کہ بے گھر ہونے والے افراد کے لیے ریلیف کیمپ قائم کیے گئے ہیں، متاثرین کو کھانا اور دیگر ضروری اشیا فراہم کی جارہی ہیں۔

متعلقہ حکام کا کہنا ہے کہ زلزلے کے جھٹکوں کے بعد آفٹر شاکس کا سلسلہ جاری رہے گا جس کے باعث پہاڑی علاقوں میں مقیم افراد کو محفوظ مقام کو منتقل کردیا گیا ہے۔

دوسری جانب انڈونیشیا کے جزیرے سولا ویسی کے کھلے سمندر میں بھی 6.2 کی شدت کا زلزلہ آیا ہے۔