سچ خبریں:فلسطین کے خبر رساں ذرائع نے اعلان کیا ہے کہ رواں سال کے آغاز سے اب تک اسرائیلی فوج کے ہاتھوں 88 فلسطینی شہید ہو چکے ہیں۔
مغربی کنارے کے خبر رساں ذرائع نے اس جمعہ کو اعلان کیا ہے کہ 2023ء کے آغاز سے اب تک مغربی کنارے اور غزہ کی پٹی کے مختلف علاقوں پر صیہونی حکومت کے حملوں میں 88 فلسطینی شہید ہو چکے ہیں جبکہ ان شہداء میں سے زیادہ تر کا تعلق مزاحمت کے مرکزی شہروں جنین اور نابلس سے ہے۔
عرب 48 کے مطابق صیہونی حکومت کے ہاتھوں فلسطین میں شہداء کی تعداد میں اضافہ اس وقت ہوا ہے جب صیہونیوں نے فلسطین کے مختلف علاقوں پر اپنے حملوں میں اضافہ کیا اور غیر قانونی تعمیرات کے بہانے ایک ہزار سے زائد رہائشی مکانات کو تباہ کر دیا۔
فلسطین کی وزارت صحت کی جانب سے جاری کردہ اعدادوشمار کے مطابق 2023 میں فلسطینی شہداء کی تعداد 88 ہو گئی ہے جن میں سے 17 بچے بتائے جاتے ہیں، فلسطینی وزارت صحت کے اعدادوشمار کے مطابق جنین میں 35 شہداء، نابلس میں 21، الخلیل میں 7 شہداء، مقبوضہ قدس میں 6 شہداء، اریحا اور اغوار میں 5، قلقیلیہ میں 5، راملہ اور البیرہ میں 3 شہداء ، غزہ میں 2 شہید، بیت لحم میں 2 شہید، سلفیت میں ایک شہید اور طوباس میں ایک شہید ہیں۔
مقبوضہ مغربی کنارے اور بیت المقدس سے موصولہ اطلاعات کے مطابق صیہونی غاصب حکومت نے نئے سال کے آغاز سے ہی فلسطینیوں کی انتظامی حراست میں اضافہ کردیا ہے، انتظامی گرفتاری کے حکم نامے میں فلسطینی معاشرے کے تمام طبقات بشمول بچے، خواتین اور بوڑھے شامل ہیں ، اس جرم کو تقویت دینے میں اسرائیلی عدالتوں کا بڑا کردار ہے۔