یوکرین کی جانب سے انڈونیشیا کا امن منصوبہ مسترد

?️ 4 جون 2023

سچ خبریں:یوکرین کی وزارت خارجہ نے انڈونیشیا کی کریمیا اور روس کے نئے الحاق شدہ علاقوں میں ریفرنڈم کرانے کی امن تجویز کو مسترد کر دیا۔

اسپوٹنک نیوز ایجنسی کی رپورٹ کے مطابق یوکرین کی وزارت خارجہ نے انڈونیشیا کی طرف سے پیش کی گئی امن تجویز کو مسترد کر دیا،انڈونیشیا کی امن تجویز میں کریمیا اور روس سے الحاق شدہ دیگر نئے علاقوں میں ریفرنڈم کا انعقاد شامل ہے،وہ علاقے جنہیں یوکرین اپنا سمجھتا ہے۔

یوکرین کی وزارت خارجہ کے ترجمان اولیگ نکولینکو نے کہا کہ ہم یوکرین میں امن کی بحالی میں انڈونیشیا کی دلچسپی کو سراہتے ہیں لیکن موجودہ تنازع میں کوئی علاقہ ایسا نہیں ہے جس میں ریفرنڈم کی ضرورت ہو۔

یاد رہے کہ نکولینکو نے کورین طرز کی جنگ بندی اور روس اور یوکرین کے درمیان اقوام متحدہ کے امن دستوں کی نگرانی میں غیر فوجی زون کی تجویز کو بھی مسترد کر دیا۔

واضح رہے کہ یہ منصوبہ انڈونیشیا کے وزیر دفاع پرابوو سوبیانتو نے سنگاپور میں ایشیا ڈیفنس سمٹ کے دوران پیش کیا جس میں یوکرین اور امریکہ کے وزرائے دفاع نے شرکت کی۔

بلومبرگ نے یوکرین کے الیکسی ریزنکوف کے حوالے سے کہا کہ یہ تجویز روسی منصوبہ لگتی ہے، انڈونیشیائی نہیں۔دوسری جانب یوکرینی ایوان صدر کے ایک سینئر اہلکار نے روس کے ساتھ جنگ کی تازہ ترین صورتحال امریکی قومی سلامتی کے مشیر کو بتائی۔