یورپ میں غزہ کے حق میں مظاہرے جاری

اس ہفتے بھی متعدد یورپی ممالک میں غزہ کے باشندوں کے حق میں اور صیہونی جرائم کی مذمت میں بڑے پیمانے پر مظاہرے ہوئے۔

واضح رہے کہ یورپی شہروں اور دارالحکومتوں میں ہزاروں افراد نے احتجاجی ریلیاں نکالیں، جن میں صیہونیوں کے ہاتھوں غزہ میں ہونے والے فاقہ کشی اور نسل کشی کے خاتمے کا مطالبہ کیا گیا، نیز محصور غزہ کے باشندوں تک فوری انسانی امداد پہنچانے کی اپیل کی گئی۔

فرانس کے دارالحکومت پیرس میں مظاہرین نے غزہ میں فلسطینیوں کے خلاف صیہونیوں کے مسلسل اجتماعی قتل عام کو روکنے کا مطالبہ کیا۔ انہوں نے صیہونی حکومت اور اس کے حامیوں پر وسیع پیمانے پر پابندیاں عائد کرنے کی بھی اپیل کی۔ مظاہرین نے فرانس سمیت مغربی حکومتوں پر زور دیا کہ وہ غزہ میں صیہونی ریاست کے جرائم میں تعاون بند کریں۔ انہوں نے مارسیلے بندرگاہ کے کارکنوں کی تعریف کی جنہوں نے صیہونی ریاست کے حائفہ بندرگاہ پر بھیجے جانے والے فوجی سازوسامان کی لوڈنگ سے انکار کر دیا تھا۔

اٹلی میں لاکھوں افراد نے دارالحکومت روم کی سڑکوں پر غزہ میں جنگ بندی کا مطالبہ کرتے ہوئے مظاہرہ کیا۔ مظاہرین نے ایک بڑا بینر اٹھا رکھا تھا جس پر لکھا تھا کہ قتل عام بند کرو، تعاون بند کرو۔ شرکاء نے فلسطینی پرچم اور "آزاد فلسطین” کے بینرز بھی اٹھا رکھے تھے۔ اطالوی خبر ایجنسی ایجی کے مطابق، اس مظاہرے میں تقریباً 3 لاکھ افراد شریک ہوئے۔

جرمنی کے دارالحکومت برلن میں بھی ایک احتجاجی اجتماع ہوا، جس میں غزہ میں اجتماعی قتل عام کے فوری خاتمے اور صیہونی ریاست کو ہتھیاروں کی فراہمی بند کرنے کا مطالبہ کیا گیا۔ اس اجتماع میں فلسطینی تارکین وطن، انسانی حقوق کے کارکنان اور فلسطین سے اظہار یکجہتی کرنے والے افراد شامل تھے، جنہوں نے جرمن حکومت پر زور دیا کہ وہ غزہ کے باشندوں کے ساتھ یکجہتی کرتے ہوئے صیہونی ریاست کو فوجی امداد دینا بند کرے۔

سویڈن کے دارالحکومت اسٹاک ہوم میں بھی غزہ کے حق میں ایک بڑی ریلی نکالی گئی، جس میں ملک بھر سے لوگوں نے شرکت کی۔ مظاہرین نے سویڈش حکومت سے مطالبہ کیا کہ وہ صیہونی ریاست کے ساتھ ہتھیاروں کی تجارت بند کرے اور اس پر سخت پابندیاں عائد کرے۔ ریلی کے شرکاء نے "سویڈن کہتا ہے: نہیں اجتماعی قتل عام کو” کے نعرے لگاتے ہوئے غزہ کے باشندوں کے ساتھ یکجہتی کا اظہار کیا اور صیہونی ریاست کے جرائم کی مذمت کی۔