کوئی بھی حزب اللہ کے ہتھیار سمندر میں پھینکنا نہیں چاہتا: لبنانی وزیر اعظم

سچ خبریں: لبنان کے وزیر اعظم نواف سلام نے جمعرات کے روز زور دیا کہ حزب اللہ کے ہتھیار تمام لبنانیوں کے اختیار میں ہونے چاہئیں اور ان کا استعمال ریاستی فیصلے کے تابع ہونا چاہیے۔

ال بی سی چینل سے گفتگو کرتے ہوئے، انہوں نے حزب اللہ کے ہتھیاروں کو سمندر میں پھینکنے یا اسرائیل کے حوالے کرنے سے متعلق افواہوں کی تردید کی، اور تصریح کی کہ حکومت تنازعے کی شدت کو روکنے اور اسرائیلی فوجیوں کے انخلا کو یقینی بنانے کی کوشش کر رہی ہے۔

وزیر اعظم نے کہا کہ لبنان میں خانہ جنگی کے ازسر شروع ہونے کا کوئی خطرہ نہیں ہے۔

نواف سلام نے بتایا کہ لبنان کی تعمیر نو کے لیے مالی وسائل درکار ہیں، اور اس سلسلے میں پارلیمنٹ نے عالمی بینک سے 250 ملین ڈالر کے قرضے کی منظوری دے دی ہے، جس کی ادائیگی امسال کے شروع میں ہونے کی توقع ہے۔

انہوں نے مقررہ پروگرام کے مطابق پارلیمانی انتخابات کرانے اور اصلاحات جاری رکھنے کے حوالے سے حکومتی عہد کی بھی توثیق کی۔

وزیر اعظم نے اگر ضرورت ہوئی تو دوبارہ وزارت عظمیٰ کے عہدے پر فائز ہونے کی اپنی آمادگی کا اظہار کیا، لیکن ساتھ ہی کہا کہ وہ "اقتدار کا بھوکا” شخص نہیں ہیں۔