چین کی ایران اور سعودی عرب کے درمیان کامیاب ثالثی کا اثر،چین کے شہر میں تاجروں کی آمد میں اضافہ

?️ 30 نومبر 2025

چین کی ایران اور سعودی عرب کے درمیان کامیاب ثالثی کا اثر،چین کے شہر میں تاجروں کی آمد میں اضافہ

چین کے جنوبی بندری شہر گوانجو میں حالیہ برسوں کے دوران مغربی ایشیا سے آنے والے تاجروں کی آمد میں نمایاں اضافہ ہوا ہے۔ چین نے جب 2023 میں ایران اور عربستان کے درمیان سفارتی تعلقات کی بحالی میں کامیاب کردار ادا کیا تو اس کے بعد گوانجو مغربی ایشیائی اور عرب تاجروں کا اہم مرکز بنتا چلا گیا۔ اسی سبب بعض ایشیائی میڈیا ادارے اسے خاورمیانہ کوچک کا نام دے رہے ہیں۔

کیودو نیوز کے مطابق گوانجو، جو چین کی تجارت اور صنعت کا اہم مرکز ہے، اب صنعتی سازوسامان، الیکٹرانکس اور روزمرہ استعمال کی چینی مصنوعات کی خریداری کے لیے تاجرانِ عرب اور مغربی ایشیا کا ترجیحی مقام بن چکا ہے۔ یہ رجحان اُس وقت مزید بڑھا جب چین اور امریکہ کے درمیان تجارتی کشیدگی میں اضافہ ہوا اور بیجنگ نے نئے معاشی شراکت داروں خصوصاً مغربی ایشیائی ریاستوں کے ساتھ تعاون کو توسیع دینا شروع کیا۔

سرکاری اعداد و شمار کے مطابق صوبہ گوانگ دونگ کی تجارت 17 مغربی ایشیائی ملکوں کے ساتھ گزشتہ برس کے مقابلے میں تقریباً 9 فیصد بڑھی ہے۔ ماہرین اس اضافے کا سبب چینی مصنوعات کی مسابقتی قیمت، قابل قبول معیار اور عرب مارکیٹوں میں بڑھتی ہوئی طلب کو قرار دیتے ہیں۔ گوانجو کے چینی تاجر بھی اس بات کی تصدیق کرتے ہیں کہ مغربی ایشیائی خریدار معیار پر سمجھوتہ نہیں کرتے اور مناسب قیمت پر بہتر مال خریدنے میں دلچسپی رکھتے ہیں۔

تاؤجین میٹرو اسٹیشن کے اطراف عرب ریستورانوں، دکانوں اور تجارتی سرگرمیوں کے پھیلاؤ نے یہاں ایک ایسی فضا بنا دی ہے جسے مقامی میڈیا خاورمیانہ کوچک کہتا ہے۔ شہر کے مرکزی علاقوں میں موجود مساجد میں جمعے کے روز ہزاروں مسلمان نماز ادا کرتے ہیں، اگرچہ چین میں مذہبی سرگرمیوں پر عمومی پابندیاں موجود ہیں۔

دوسری جانب غیرملکی باشندوں کی بڑھتی ہوئی تعداد کے باعث رہائشی ویزوں کے حصول میں سختی کی گئی ہے۔ اب چین میں قیام کے لیے یونیورسٹی کی ڈگری اور کم از کم دو سال کے پیشہ ورانہ تجربے کو بنیادی شرط قرار دیا گیا ہے۔

اس کے باوجود گوانجو کے مقامی حکام کا کہنا ہے کہ تجارتی شراکت داری میں تنوع چینی حکومت کی قومی پالیسی کا حصہ ہے اور توقع ہے کہ مغربی ایشیائی تاجروں کی موجودگی شہر میں آئندہ بھی برقرار رہے گی۔