سچ خبریں:فلسطین کی الاقصی بریگیڈ کے ایک اہم کمانڈر سمیت چھ فلسطینی قیدی صیہونیوں کی انتہائی سکیورٹی کی حامل جیل سے فرار ہونے میں کامیاب ہوگئے ہیں۔
صیہونی حکام کی جانب سے جاری کیے جانے والے بیان میں کہا گیا ہے کہ 6 فلسطینی زیر زمین بنائی گئی ایک سرنگ کے ذریعے جیل سے فرار ہو گئے ہیں۔
صیہونی حکام کے مطابق گبوا جیل میں صبح 3 بجے کے قریب کچھ مشتبہ افراد کی موجودگی کا الرٹ ملا اور بعدازاں اس بات کی تصدیق ہوئی کہ جیل سے الاقصیٰ بریگیڈ کے سابق سربراہ زکریا زبیدی سمیت 6 فلسطینی فرار ہونے میں کامیاب ہو گئے ہیں،صیہونی وزیراعظم نفتالی بینیٹ نے جیل سے فلسطینیوں کے فرار کو انتہائی شرمناک واقعہ قرار دیا ہے جبکہ صیہونی پولیس اور آرمی نے مفرور قیدیوں کی گرفتاری کے لیے تلاش شروع کر دی ہے۔
اسرائیل حکام کا کہنا ہے کہ فلسطینی قیدیوں کی گرفتاری کے لئے جگہ جگہ چھاپے مارے جارہے ہیں،تاہم ابھی تک کوئی نتیجہ حاصل نہیں ہوا ہے ،یادرہے کہ صیہونی حکام اپنے من مانے طریقوں سے جب چاہتے ہیں فلسطینی آبادیوں پر چھاپے مارتے ہیں اور بے گناہ افراد کو بغیر کسی جرم کے حراست میں لے لیتے ہیں جہاں انھیں طرح طرح کی ایذائیں پہنچانے کے ساتھ ان پر سنگین جرائم کی ایک لمبی فہرست عائد کر دی جاتی ہے جس کے کئی سال بعد انھیں صیہونی غیر قانونی عدالت میں پیش کیا جاتا ہے اور وہاں بھی وہی فیصلہ ہوتا ہے جو صیہونی چاہتے ہیں اور اس طرح کئی فلسطینی شہریوں کی پوری زندگی صیہونی جیلوں میں گذر گئی ہے جہاں انھیں کوئی پوچھنے والا نہیں۔