پریس کانفرنس کے دوران ٹرمپ نے ٹیلی وژن نیٹ ورک اے بی سی کا لائسنس منسوخ کرنے کا مطالبہ کر دیا

?️ 19 نومبر 2025

پریس کانفرنس کے دوران ٹرمپ نے ٹیلی وژن نیٹ ورک اے بی سی کا لائسنس منسوخ کرنے کا مطالبہ کر دیا۔

امریکی صدر ڈونلڈ ٹرمپ نے وائٹ ہاؤس میں سعودی ولیعہد کے ساتھ مشترکہ پریس کانفرنس کے دوران امریکی ٹیلی وژن نیٹ ورک اے بی سی کا نشریاتی لائسنس منسوخ کرنے کا مطالبہ کر دیا۔ یہ واقعہ اس وقت پیش آیا جب اے بی سی کے ایک رپورٹر نے ٹرمپ سے جفری اپستین اسکینڈل سے متعلق سوال پوچھا، جس پر ٹرمپ برہم ہو گئے۔

ٹرمپ نے کہا کہ اے بی سی کی خبرسازی “انتہائی جعلی اور غلط” ہے، اس لیے اس کا لائسنس منسوخ ہونا چاہیے۔ انہوں نے وفاقی کمیونیکیشن کمیشن (ایف سی سی) کے سربراہ برینڈن کار کی تعریف کرتے ہوئے کہا کہ وہ اس معاملے کا جائزہ لیں۔

برینڈن کار نے چند روز قبل سوشل میڈیا پر بتایا تھا کہ وہ تعطیلات کے دوران فلوریڈا میں ٹرمپ سے ملاقات کر چکے ہیں۔

یہ پہلی بار نہیں کہ اے بی سی ٹرمپ کے نشانے پر آیا ہو۔ اس سے قبل بھی ٹرمپ نے ایف سی سی سے مطالبہ کیا تھا کہ اے بی سی اور این بی سی کے ٹی وی اسٹیشنز کا لائسنس منسوخ کیا جائے اور انہیں عوامی فضائی لہروں کے استعمال پر جرمانہ کیا جائے۔

واضح رہے کہ ایف سی سی ایک خودمختار ادارہ ہے جو آٹھ سالہ نشریاتی لائسنس جاری کرتا ہے، لیکن یہ لائسنس ٹی وی اسٹیشنوں کو دیے جاتے ہیں، نیٹ ورکس کو نہیں۔ ادارہ مخصوص اور کم استعمال ہونے والے قانونی معیار کے تحت لائسنس منسوخ کر سکتا ہے، تاہم ایسا فیصلہ گزشتہ چالیس برسوں سے نہیں ہوا۔