ٹرمپ کو ہماری قوم کی توہین کے بجائے امریکی شہریوں پر توجہ دینی چاہیے:سومالیہ کے وزیرِ دفاع

?️ 13 دسمبر 2025

 ٹرمپ کو ہماری قوم کی توہین کے بجائے امریکی شہریوں پر توجہ دینی چاہیے:سومالیہ کے وزیرِ دفاع

 سومالیہ کے وزیرِ دفاع نے امریکی صدر ڈونلڈ ٹرمپ کے سومالی عوام کے خلاف بیانات پر سخت ردعمل دیتے ہوئے کہا ہے کہ سومالی عوام کسی بھی طرف سے توہین اور تحقیر کو قبول نہیں کرتے، اور ٹرمپ کو سومالیہ پر تنقید کرنے کے بجائے امریکی عوام کے ساتھ کیے گئے اپنے وعدوں پر توجہ مرکوز کرنی چاہیے۔

ایرنا نے جمعرات کی شب المیادین نیٹ ورک کے حوالے سے رپورٹ کیا کہ صومالیہ کے وزیرِ دفاع احمد معلم فقی احمد نے ڈونلڈ ٹرمپ کے حالیہ بیانات کے جواب میں کہا کہ سومالی عوام کبھی بھی توہین برداشت نہیں کریں گے، اور بہتر ہوگا کہ ٹرمپ سومالیہ میں مداخلت کے بجائے امریکی شہریوں کے لیے اپنی انتخابی ذمہ داریوں کو پورا کرنے پر توجہ دیں۔

انہوں نے سومالی عوام کی خصوصیات کا ذکر کرتے ہوئے کہا کہ صومالی باشندے دنیا بھر میں اپنی محنت، لچک اور مشکلات برداشت کرنے کی صلاحیت کے باعث جانے جاتے ہیں۔

وزیرِ دفاع نے مزید کہا کہ سومالی عوام نے شدید مشکلات اور بڑی دشمنیوں کا سامنا کیا ہے، جن میں وہ عناصر بھی شامل ہیں جو ان کے وجود سے انکار کرتے ہیں، انہیں ذلیل کرتے ہیں، قتل کرتے ہیں اور ان کی توہین کرتے ہیں، لیکن اس کے باوجود سومالی عوام نے ان تمام حالات پر قابو پایا اور زندہ رہے۔

واضح رہے کہ ڈونلڈ ٹرمپ نے منگل کے روز ریاست پنسلوانیا میں ایک انتخابی جلسے کے دوران ایک بار پھر ترقی پذیر ممالک سے ہونے والی ہجرت پر تنقید کرتے ہوئے کہا ہم ہمیشہ سومالیہ جیسے ممالک سے لوگوں کو لاتے ہیں، جو تباہ حال جگہیں ہیں، گندی، نفرت انگیز اور جرائم سے بھری ہوئی۔

انہوں نے سومالیہ کے ساحلوں پر قزاقی کا حوالہ دیتے ہوئے مزید کہا وہ صرف ایک ہی کام میں اچھے ہیں، اور وہ ہے جہازوں کا پیچھا کرنا۔

امریکی صدر نے گزشتہ ہفتے کابینہ کے ایک اجلاس میں بھی سومالی باشندوں کو قبضہ کرنے والے قرار دیتے ہوئے کہا تھا:وہ ایک دوسرے کے پیچھے دوڑتے ہیں اور ایک دوسرے کو قتل کرتے ہیں۔

ٹرمپ کی جانب سے سومالی عوام کے خلاف یہ لفظی حملے گزشتہ ماہ واشنگٹن میں پیش آنے والے فائرنگ کے واقعے کے بعد شدت اختیار کر گئے، جس میں نیشنل گارڈ کے دو اہلکار ہلاک ہو گئے تھے۔ اس واقعے میں ایک افغان شہری پر قتل کا الزام عائد کیا گیا تھا، جس کے بعد ٹرمپ نے غریب ممالک سے ہجرت روکنے کا وعدہ کیا۔