ٹرمپ کا تجارتی جنگ سے حاصل آمدنی میں سے امریکیوں پر پیسے نچاور

ٹرمپ کا تجارتی جنگ سے حاصل آمدنی میں سے امریکیوں پر پیسے نچاور

 امریکی صدر ڈونالڈ ٹرمپ نے اعلان کیا ہے کہ وفاقی حکومت ہر اہلِ امریکی شہری کو 2 ہزار ڈالر نقد ادائیگی کرے گی، اور یہ رقم مکمل طور پر درآمدی ٹیرف سے حاصل ہونے والی آمدنی سے مہیا کی جائے گی۔

امریکی نشریاتی ادارے اے بی سی نیوز کے مطابق ٹرمپ نے اپنی سوشل میڈیا پلیٹ فارم ٹروث سوشل پر لکھا کہ تمام شہری—سوائے زیادہ آمدنی رکھنے والے افراد کےکم از کم دو ہزار ڈالر بطور منفعت حاصل کریں گے۔

اگرچہ اس منصوبے کے نفاذ کے لیے کانگریس کی منظوری ضروری ہوگی، لیکن یہ تجویز اس بل سے مشابہ ہے جو رواں سال گرمیوں میں ریپبلکن سینیٹر جاش ہاؤلی نے پیش کیا تھا۔ ہاؤلی کے مجوزہ قانون میں تقریباً تمام امریکیوں اور ان کے زیرکفالت بچوں کے لیے 600 ڈالر کی ادائیگی کی تجویز شامل تھی، جو ٹیرف آمدنی کے ایک حصے کی واپسی کے طور پر پیش کی گئی تھی۔

ہاؤلی کا کہنا تھا کہ یہ قانون امریکی محنت کشوں کو تجارت سے حاصل ہونے والے اس اضافی ثمر سے براہِ راست فائدہ پہنچائے گا جسے ٹرمپ کی محصولات نے ملک کی طرف موڑا ہے۔

دوسری جانب، امریکی وزیر خزانہ اسکات بسنت نے اگست میں CNBC کو بتایا تھا کہ حکومت کی پہلی ترجیح ٹیرف آمدنی کو 38.12 ٹریلین ڈالر کے قومی قرضے کی ادائیگی پر استعمال کرنا ہے۔

ٹرمپ نے بھی حالیہ بیان میں دعویٰ کیا کہ حکومت محصولات سے حاصل ہونے والی آمدنی کو امریکہ کے "عظیم” قرض کی ادائیگی میں لگائے گی۔

ٹرمپ نے مزید کہا:ہم اس وقت دنیا کے امیرترین اور باوقار ترین ممالک میں شامل ہیں، مہنگائی نہ ہونے کے برابر ہے، اور اسٹاک مارکیٹ تاریخی سطح پر ہے۔ ہم بہت جلد اپنے 37 ٹریلین ڈالر کے بڑے قرض کی ادائیگی شروع کریں گے۔

وزارت خزانہ کے مطابق ستمبر میں جاری اعدادوشمار سے ظاہر ہوتا ہے کہ حکومت نے سال 2024 کے پہلے 9 ماہ میں 195 ارب ڈالر محصولات سے حاصل کیے۔

یہ اعلان ایسے وقت میں سامنے آیا ہے جب سپریم کورٹ نے صدر کے اس اختیار پر سوال اٹھایا ہے کہ آیا وہ تقریباً دنیا کے ہر ملک پر ٹیرف عائد کر سکتے ہیں یا نہیں۔ ٹرمپ پہلے بھی سپریم کورٹ کے موقف پر تنقید کرتے رہے ہیں۔

ٹرمپ نے رواں سال کے آغاز میں چین، کینیڈا، میکسیکو اور یورپی یونین سمیت کئی اہم تجارتی شراکت داروں پر بھی محصولات عائد کیے تھے۔