نیتن یاہو  بار بار جنگ بندی کی راہ میں رکاوٹ بنا ہے:سابق امریکی ترجمان 

نیتن یاہو  بار بار جنگ بندی کی راہ میں رکاوٹ بنا ہے:سابق امریکی ترجمان

امریکہ کے سابق ترجمانِ وزارت خارجہ، میتیو میلر نے انکشاف کیا ہے کہ اسرائیلی وزیر اعظم بنیامین نیتن یاہو مسلسل نئے شرائط عائد کر کے آتش‌بس کے معاہدے میں رکاوٹ ڈالتے رہے ہیں۔

میلر نے اسرائیلی چینل ۱۳ کو بتایا کہ جب بھی مذاکرات کسی نتیجے کے قریب پہنچتے، نیتن یاہو  نئی شرائط رکھ کر سمجھوتے کو ناممکن بنا دیتے۔ ان کے بقول، اسرائیلی کابینہ نے آتش‌بس کی راہ میں بارہا سنگ اندازی کی اور واضح کیا کہ جنگ کئی دہائیوں تک جاری رکھی جائے گی۔

چینل ۱۳ کی رپورٹ کے مطابق، نیتن یاہو کے ساتھ ساتھ انتہاپسند وزراء ایتمار بن گویر اور بتسلئیل اسموتریچ نے کم از کم پانچ بار حماس کے ساتھ قیدیوں کے تبادلے کے معاہدے کو ناکام بنایا۔ رپورٹ میں کہا گیا کہ اسرائیلی حکومت یہ دعویٰ نہیں کر سکتی کہ اس نے اپنے قیدیوں کی آزادی کے لیے ہر ممکن کوشش کی ہے۔

سروے کے مطابق، اسرائیل کے ۷۱ فیصد عوام جنگِ غزہ کے خاتمے اور حماس سے معاہدے کے حق میں ہیں، جب کہ اعلیٰ فوجی و سیکیورٹی حکام بھی بارہا متنبہ کر چکے ہیں کہ غزہ پر قبضے کا منصوبہ، ماضی کی طرح ناکامی سے دوچار ہوگا۔ ان کا کہنا ہے کہ غزہ اسرائیل کے لیے ویسا ہی دلدل بن سکتا ہے جیسا افغانستان اور ویتنام امریکہ کے لیے بنے تھے۔

اسرائیلی کنسٹ کے رکن اور کمیٹی برائے خارجہ و دفاع کے رکن عامیت ہالوی نے بھی خبردار کیا ہے کہ غزہ شہر پر قبضے کی کوشش دوسرے مرحلے میں بھی ناکام ہوگی۔ ان کے مطابق، یہ آپریشن نہ صرف بھاری نقصان کا باعث بنے گا بلکہ فوج اپنے اہداف حاصل کرنے میں بھی ناکام رہے گی۔