نئی حکومت کے اعلان کے لیے تیاریاں مکمل ہو چکی ہیں: طالبان

🗓️ 7 ستمبر 2021

سچ خبریں:طالبان کے ترجمان کا کہنا ہے کہ افغانستان میں نئی حکومت متعارف کرانے کی تیاریاں کی جاچکی ہیں اور حکومت کے ڈھانچے کا اعلان جلد کیا جائے گا۔
اسپوٹنک نیوز ایجنسی کی رپورٹ کے مطابق طالبان کے ایک ترجمان احمد اللہ متقی نے ٹویٹ کیا کہ افغان حکومت کے نئے ڈھانچے کے اعلان کی تیاریاں مکمل ہوچکی ہیں اور جلد ہی انھیں حتمی شکل دے دی جائے گی، تاہم طالبان ترجمان نے اس قیاس آرائی پر کوئی تبصرہ نہیں کیا کہ آیا اس گروپ کے سیاسی نائب ملا عبدالغنی برادر نئی حکومت کی قیادت کریں گے۔

واضح رہے کہ قبل ازیں طالبان کی جانب سے پنجشیر پر مکمل کنٹرول کا دعویٰ کرنے کے بعد اس گروپ کے ترجمان ذبیح اللہ مجاہد نے ایک نیوز کانفرنس میں کہاکہ افغانستان میں جنگ ختم ہوچکی ہے اور آئندہ چند دنوں میں نئی حکومت کا اعلان متوقع ہے،انہوں نے مزید کہا کہ افغانستان میں جنگ کے خاتمے کے ساتھ ، حکومت کے قیام میں تاخیر کا کوئی عذر نہیں ہے اور اب وقت ہے کہ ملک کی تعمیر نو کی جائے۔

حکومت بنانے کی تفصیلات کے بارے میں مجاہد نے مزید کہاکہ صرف تکنیکی کام باقی ہے ، ہم بھی جلدی میں ہیں،تاہم امکان ہے کہ فی الحال حکومت عبوری ہو جس میں اصلاحات ، تبدیلی اور دیگر بنیادی اقدامات انجام دیے جائیں گے،ان کے مطابق ابھی انتخابات نہیں ہوں گے ،یہ اگلی حکومت فیصلہ کرے گی کہ اگلا لائحۂ عمل کیسا ہوگا۔

یادرہے کہ اس سے قبل الجزیرہ چینل نے طالبان سے وابستہ ذرائع کے حوالے سے بتایا کہ چھ ممالک ترکی ، روس ، چین ، ایران ، پاکستان اور قطر کو کابل کی نئی حکومت کے اعلان کے لیے اجلاس میں شرکت کی دعوت دی گئی ہے،دریں اثنا پنجشیر مزاحمتی محاذ نے صوبے پر مکمل کنٹرول کرنےکے طالبان کے دعوے کو چیلنج کرتے ہوئے کہا ہے کہ لڑائی جاری ہے۔