مغربی کنارے کے الحاق میں امریکہ صہیونیوں کا شریک ہے

مغربی کنارے کے الحاق میں امریکہ صہیونیوں کا شریک ہے

: فلسطینی تنظیم حرکة الجهاد الإسلامي في فلسطين نے اپنے ایک بیان میں کہا ہے کہ امریکہ مغربی کنارے میں اسرائیلی اقدامات کی کھلی حمایت کر رہا ہے اور اس کے حالیہ فیصلے الحاق کے منصوبے کا حصہ ہیں۔

 جہاد اسلامی نے ایک بیان میں کہا کہ مقبوضہ بیت المقدس میں امریکی سفارت خانے کی جانب سے کرانۂ باختری کی بستی “افرات” میں قونصلر خدمات فراہم کرنے کا اعلان بین الاقوامی قوانین اور معاہدوں کی صریح خلاف ورزی ہے۔ تنظیم کے مطابق یہ اقدام اسرائیلی آبادکاری منصوبوں اور الحاق کی پالیسیوں کی سیاسی توثیق کے مترادف ہے۔

بیان میں کہا گیا کہ اگرچہ واشنگٹن اس اقدام کو بیرونِ ملک مقیم امریکی شہریوں کے لیے معمول کی سہولت قرار دے رہا ہے، تاہم اس سے اس کے خطرناک اثرات کم نہیں ہوتے۔ تنظیم نے اسے “خاموش الحاق” کی پالیسی میں عملی شراکت قرار دیا۔

جہاد اسلامی نے مزید کہا کہ مقبوضہ علاقوں میں قائم بستیوں کے اندر سرکاری خدمات کی فراہمی محض انتظامی عمل نہیں بلکہ اسرائیلی بستیوں کی قانونی حیثیت کو تسلیم کرنے کے مترادف ہے۔

دوسری جانب فلسطینی تنظیم حماس نے بھی اسی نوعیت کا بیان جاری کرتے ہوئے امریکی اقدام کو خطرناک نظیر قرار دیا اور کہا کہ یہ بین الاقوامی قوانین کی خلاف ورزی اور فلسطینی عوام کے قومی حقوق کو کمزور کرنے کی کوشش ہے۔

بیانات میں امریکی صدر ڈونلڈ ٹرمپ اور امریکی سفیر مائیک ہکبی کے حالیہ مؤقف پر بھی تنقید کی گئی اور کہا گیا کہ واشنگٹن کے اعلانات اور عملی اقدامات میں تضاد پایا جاتا ہے۔

واضح رہے کہ امریکی سفارت خانے نے اعلان کیا ہے کہ وہ کرانۂ باختری کے مختلف مقامات پر امریکی شہریوں کو پاسپورٹ سمیت دیگر قونصلر خدمات فراہم کرے گا، جسے فلسطینی تنظیمیں اسرائیلی آبادکاری اور قبضے کو تقویت دینے کے مترادف قرار دے رہی ہیں۔