مشرق وسطی کا نیا منظرنامہ،جنگ بندی کی کوششوں سے لیکر تل ابیب پر بڑھتے دباؤ تک

?️ 30 نومبر 2025

مشرق وسطی کا نیا منظرنامہ،جنگ بندی کی کوششوں سے لیکر تل ابیب پر بڑھتے دباؤ تک

مشرقِ وسطیٰ اس وقت ایک نئے سیاسی اور سیکورٹی مرحلے میں داخل ہو رہا ہے۔ غزہ میں جنگ بندی کے نفاذ اور تعمیر نو کے آغاز کے لیے بین الاقوامی سفارت کاری جاری ہے، لیکن اس کے ساتھ ہی لبنان میں کشیدگی، تل ابیب میں حکومت مخالف مظاہرے اور اسرائیلی حکومت کی جانب سے فلسطینیوں کے خلاف سخت گیر اقدامات خطے کی صورت حال کو مزید پیچیدہ بنا رہے ہیں۔

گزشتہ ہفتے کے دوران کئی اہم واقعات سامنے آئے۔ ترک صدر رجب طیب اردوغان نے کہا کہ حماس نے اسرائیلی خلاف ورزیوں کے باوجود غیر معمولی صبر کا مظاہرہ کیا ہے اور اب بھی مکمل جنگ بندی پر قائم ہے۔ فرانس اور جرمنی نے لبنان پر اسرائیلی حملوں میں اضافے پر تشویش کا اظہار کرتے ہوئے خطے میں مزید بگاڑ سے خبردار کیا۔ دوسری جانب اسرائیل نے گزشتہ مہینوں میں فلسطینی خواتین کی گرفتاریوں میں غیر معمولی اضافہ کیا ہے، جس کی وجہ وہ مبینہ طور پر اسرائیل مخالف فضا سازی قرار دے رہا ہے۔

مصری صدر اور وزیرِ خارجہ نے غزہ میں جنگ بندی معاہدوں پر عمل درآمد کو ضروری قرار دیتے ہوئے اعلان کیا کہ قاہرہ جلد ایک بین الاقوامی کانفرنس کی میزبانی کرے گا جس میں تعمیر نو اور انسانی امداد کے عملی مراحل پر بات کی جائے گی۔ حماس کے ایک سینئر رہنما نے کہا کہ معاہدے کے دوسرے مرحلے کا آغاز اسی صورت ممکن ہے جب اسرائیل تمام شقوں پر مکمل عمل کرے۔ اقوام متحدہ نے بھی سوڈان میں تین ماہ کی جنگ بندی کا خیر مقدم کیا ہے اور اسے مثبت پیش رفت قرار دیا ہے۔

عراق میں النجباء تحریک کے ترجمان نے اعلان کیا کہ مزاحمتی ہتھیار سرخ لکیر ہیں اور یہ عراق کو دہشت گردی اور امریکی سازشوں سے تحفظ فراہم کرتے ہیں۔ اسی دوران امریکا کے سابق صدر ڈونلڈ ٹرمپ کے نمائندے مارک ساویا نے کہا کہ گزشتہ سالوں میں بغداد اور واشنگٹن کے درمیان شراکت داری میں قابلِ ذکر پیش رفت ہوئی ہے۔ اقوام متحدہ کی ایک اور رپورٹ میں کہا گیا ہے کہ اسرائیل کی غزہ پر حالیہ جنگ نے انسانی تاریخ کی سب سے بڑی انسان ساختہ تباہی کو جنم دیا ہے اور اس علاقے کی تعمیر نو کے لیے کم از کم 70 ارب ڈالر درکار ہوں گے۔

فلسطین کے مقبوضہ علاقوں میں بس اسٹیشنوں کی ڈیجیٹل اسکرینوں پر ایک غیر معمولی سائبر حملہ بھی رپورٹ ہوا جس میں تکبیر اور قرآنی آیات نشر ہونے سے شہر میں خوف و ہراس پھیل گیا اور اسرائیلی سیکورٹی ادارے فوری کارروائی پر مجبور ہو گئے۔ اسی دوران عرب لیگ نے دمشق کے قریب بیت جن پر اسرائیلی حملے کی سخت مذمت کرتے ہوئے اسے بین الاقوامی قوانین کی کھلی خلاف ورزی قرار دیا۔ لبنان کے ساتھ جنگ بندی کے لیے کیے گئے معاہدے کو ایک سال گزرنے کے باوجود اسرائیلی حملوں کا سلسلہ جاری ہے اور زمینی صورتحال کسی بڑی تبدیلی کی عکاسی نہیں کرتی۔

اسرائیل کے اندر بھی سیاسی دباؤ بڑھ رہا ہے۔ تازہ ترین سروے کے مطابق وزیر اعظم بنیامین نتنیاہو آئندہ انتخابات میں ایک بار پھر اپوزیشن کے سامنے شکست کھا سکتے ہیں۔ معاریو کے سروے میں بتایا گیا ہے کہ نتنیاہو کی لیکود پارٹی کی حمایت میں کوئی خاص اضافہ نہیں ہوا اور ان کا موجودہ اتحاد کنسٹ میں صرف انچاس نشستیں حاصل کر پائے گا، جبکہ اکثریت کے لیے اکسٹھ نشستیں ضروری ہیں۔ دوسری جانب اپوزیشن عرب جماعتوں کی شمولیت کے بغیر بھی واضح برتری حاصل کر سکتی ہے۔

لبنان کے حوالے سے بھی تل ابیب کی ناراضی بڑھ رہی ہے۔ اسرائیلی میڈیا کے مطابق حکومت نے امریکا سے شکایت کی ہے کہ لبنانی فوج حزب اللہ کو غیر مسلح کرنے کے منصوبے پر عمل کرنے میں ناکام رہی ہے۔ اسرائیل نے بیروت کو دھمکی دی ہے کہ اگر یہ صورتحال برقرار رہی تو فضائی حملوں کی حدود بڑھا دی جائیں گی۔ بین الاقوامی دباؤ کے بعد لبنان نے پہلی بار اس منصوبے سے متعلق کچھ دستاویزات جاری کی ہیں تاکہ اپنی کوششوں کو ثابت کر سکے۔

اس دوران تل ابیب میں نتن یاہو مخالف مظاہروں کا سلسلہ بھی جاری ہے۔ ہزاروں مظاہرین حکومت کی پالیسیوں پر عدم اعتماد کا اظہار کرتے ہوئے اعلان کر چکے ہیں کہ وہ اس وقت تک احتجاج جاری رکھیں گے جب تک حکومت مستعفی نہیں ہو جاتی۔ مختلف اسرائیلی شہروں میں پچھلے چند دنوں سے حکومت مخالف ریلیاں مسلسل منعقد ہو رہی ہیں، جو اس بات کی طرف اشارہ کرتی ہیں کہ نتن یاہو حکومت کو داخلی محاذ پر بھی شدید چیلنجز کا سامنا ہے۔