مسجد الاقصی پہنچو؛فلسطینی مزاحمتی تحریک کی اپیل

?️ 22 جولائی 2022

سچ خبریں:فلسطینی مزاحمتی تحریک نے فلسطینی عوام سے صیہونی سازشوں کو ناکام بنانے کے لیے وسیع پیمانے پر مسجد الاقصی میں پہنچنے کی اپیل کی۔
وفا خبر رساں ایجنسی کی رپورٹ کے مطابق فلسطینی رہنماؤں اور مزاحمتی تنظیموں نے عوام سے اپیل کی ہے کہ وہ مسجد الاقصیٰ سے متعلق اسرائیل کی سازشوں کو ناکام بنانے کے لئے جمعہ کو بڑے پیمانے پر مسجد الاقصی میں پہنچیں اور نماز جمعہ میں شرکت کریں۔

واضح رہے کہ فلسطینی رہنماؤں اور تنظیموں نے یہ اپیل ایسے وقت میں کی گئی ہے کہ جب گزشتہ روز اسرائیلی فوجیوں کے سکیورٹی حصار میں درجنوں انتہا پسند صیہونی باب المغاربه سے مسجد الاقصیٰ میں درآئے تھے، فلسطینی رہنماؤں اور تنظیموں کا کہنا ہے کہ بڑے پیمانے پر فلسطینیوں کا اجتماع اسرائیل کی جانب سے مسجد الاقصیٰ کو نقصان پہنچانے اور غیر قانونی کھدائی کی راہ میں رکاوٹ کا باعث بن سکتا ہے۔

یاد رہے کہ حالیہ مہینوں میں فلسطینیوں کے خلاف صیہونی انتہاپسندوں اور اسرائیلی فوجیوں کے درمیان تشدد میں کافی اضافہ ہوا ہے، واضح رہے کہ صیہونی حکومت اور انتہاپسند، مسجد الاقصی پر یلغار اور غرب اردن کے تاریخی مقامات پر حملہ کرکے ان مقامات پر قبضہ کرنا اور صیہونی کالونیوں کو توسیع دینا چاہتے ہیں۔

فلسطینی مزاحمتی گروہوں نے مسجد الاقصیٰ میں صیہونیوں کے حالیہ جرائم پر ردعمل ظاہر کرتے ہوئے ایک بار پھر اپنے اس موقف پر زور دیا ہے کہ مسلح استقامت ہی واحد آپشن ہے جو صیہونی حکومت کو فلسطینی شہریوں کے خلاف جرائم کے ارتکاب سے روک سکتا ہے اور وہ ہرگز اس آپشن سے دستبردار نہیں ہوں گے۔