مسئلہ فلسطین کے حل کے لیے چین کا نیا منصوبہ

🗓️ 15 جون 2023

سچ خبریں:چینی سینٹرل ٹیلی ویژن سی سی ٹی وی نے اطلاع دی ہے کہ صدر شی جن پنگ نے بدھ کے روز فلسطینی اتھارٹی کے صدر محمود عباس کے ساتھ ملاقات میں مسئلہ فلسطین کے حل کے لیے ایک مجوزہ منصوبہ پیش کیا۔

چین کے سرکاری ٹیلی ویژن کے مطابق اس ملک کے صدر نے محمود عباس کے ساتھ ملاقات میں اس مجوزہ منصوبے کے بارے میں وضاحت کرتے ہوئے کہا کہ سب سے پہلے مسئلہ فلسطین کا بنیادی حل ایک آزاد فلسطینی ریاست کے قیام پر مبنی ہونا چاہیے۔ 1967 کی سرحدوں پر مبنی خودمختاری اور مشرقی القدس کو اس کا دارالحکومت قرار دیا جائے۔

اس مجوزہ منصوبے کے دوسرے آرٹیکل کی وضاحت کرتے ہوئے شی جن پنگ نے کہا کہ دوسرےیہ کہ فلسطینی معیشت اور فلسطینی عوام کی روزی روٹی کی ضروریات کو پورا کیا جانا چاہیے اور اس دوران عالمی برادری کو فلسطین کے لیے اپنی امداد میں اضافہ کرنا چاہیے۔

چین کے صدر نے مزید کہا کہ تیسرے مرحلے میں امن مذاکرات کے درست راستے پر چلنا چاہیے۔ القدس کے مقدس مقامات کی موجودہ تاریخی حیثیت کا احترام کیا جانا چاہیے، اشتعال انگیز اور انتہائی اقدامات اور بیانات کی ممانعت کی جانی چاہیے، فلسطین کے لیے زیادہ بااثر، طاقتور اور وسیع تر بین الاقوامی امن کانفرنس کے انعقاد کی حمایت کرتے ہوئے امن مذاکرات کی بحالی کے لیے حالات پیدا کیے جائیں۔

محمود عباس کا بیجنگ کا دورہ چین اور فلسطین کے درمیان سفارتی تعلقات کے آغاز کے 35 سال مکمل ہونے کے موقع پر ہوا ہے۔ اس دورے کے دوران محمود عباس نے شی جن پنگ سے ملاقات کی اور فلسطین کی تازہ ترین پیش رفت کے ساتھ ساتھ دیگر علاقائی اور بین الاقوامی مسائل پر تبادلہ خیال کیا۔