مایکروسافٹ کے دفتر پر فلسطین کے حامیوں کا قبضہ 

مایکروسافٹ کے دفتر پر فلسطین کے حامیوں کا قبضہ

فلسطین کے حامی کارکنوں اور مائیکروسافٹ کے موجودہ و سابقہ ملازمین نے واشنگٹن میں اس کمپنی کے مرکزی دفتر کے اندر احتجاجی کیمپ قائم کر دیا اور اس کے مرکزی احاطے کا نام تبدیل کر کے شہید فلسطینی بچوں کا میدان رکھ دیا۔

الجزیرہ کے مطابق، برطانوی روزنامہ گارڈین نے رپورٹ دی ہے کہ مائیکروسافٹ کے ملازمین نے اسرائیلی فوج کے ساتھ کمپنی کے تعلقات کے خلاف احتجاج کرتے ہوئے اس کا مرکزی دفتر اپنی تحویل میں لے لیا۔

رپورٹ کے مطابق، مظاہرین نے دھرنا کیمپ قائم کیے اور کمپنی کے مرکزی احاطے کو شہید فلسطینی بچوں کا میدان قرار دیا۔شرکا نے مطالبہ کیا کہ مائیکروسافٹ کے اعلیٰ عہدیدار ان کے درمیان آ کر اسرائیلی فوج کے ساتھ تعاون ختم کرنے کا اعلان کریں۔

ٹیلیگرام چینل فلسطین پوسٹ نے بھی تصاویر شائع کرتے ہوئے بتایا کہ مائیکروسافٹ کے موجودہ و سابقہ ملازمین اور فلسطین کے حامی کارکنوں نے غزہ کے عوام سے یکجہتی اور اس پٹی میں جاری نسل کشی کی مذمت کے لیے دفتر کے اندر احتجاجی خیمے نصب کیے۔

تصاویر میں دیکھا جا سکتا ہے کہ فلسطین کے حامی کارکن ہاتھوں میں فلسطینی پرچم اٹھائے فلسطین کی آزادی کے نعرے لگا رہے ہیں۔