قسد کا عبوری شامی حکومت سے نئے معاہدے کا اعلان،جامع جنگ بندی اور انضمام پر اتفاق

قسد کا عبوری شامی حکومت سے نئے معاہدے کا اعلان، جامع جنگ بندی اور انضمام پر اتفاق

شامی ڈیموکریٹک فورسز (قسد) نے عبوری شامی حکومت کے ساتھ ایک نئے اور جامع جنگ بندی معاہدے کا اعلان کیا ہے، جس کے تحت مشترکہ فوجی بریگیڈز کی تشکیل اور قسد کے عسکری و انتظامی اداروں کو سرکاری ڈھانچے میں ضم کیا جائے گا۔

قسد کے میڈیا سینٹر کے مطابق یہ معاہدہ دونوں فریقین کے درمیان جھڑپوں کے خاتمے، فوجی اور انتظامی انضمام کے مرحلہ وار عمل اور باہمی تعاون کے فروغ پر مبنی ہے۔ معاہدے کے تحت فوجی دستے رابطہ لائنوں سے پیچھے ہٹیں گے جبکہ عبوری حکومت کی وزارتِ داخلہ سے وابستہ سکیورٹی فورسز الحسکہ اور قامشلی کے مرکزی علاقوں میں تعینات ہوں گی۔

بیان میں کہا گیا ہے کہ معاہدے کے تحت قسد کی تین بریگیڈز پر مشتمل ایک مشترکہ فوجی بریگیڈ تشکیل دی جائے گی، جبکہ کوبانی کی فورسز کو صوبہ حلب سے وابستہ ایک بریگیڈ میں شامل کیا جائے گا۔ اس کے علاوہ خودمختار انتظامیہ کے اداروں کو شامی ریاستی اداروں میں ضم کیا جائے گا اور سول ملازمین کی حیثیت برقرار رہے گی۔

معاہدے میں کرد شہریوں کے تعلیمی و شہری حقوق کے تصفیے، بے گھر افراد کی واپسی کی ضمانت اور قومی مفاہمت کو فروغ دینے کی شقیں بھی شامل ہیں۔

قسد کے مطابق اس معاہدے کا مقصد شام کی علاقائی وحدت کا تحفظ، مکمل انضمام کے عمل کو آگے بڑھانا اور ملک کی تعمیرِ نو کے لیے مشترکہ کوششوں کو مضبوط بنانا ہے۔

واضح رہے کہ اس سے قبل بھی 18 جنوری 2026 کو عبوری شامی حکومت اور قسد کے درمیان جنگ بندی اور انضمام سے متعلق ایک معاہدہ طے پایا تھا، جو مشرقی اور شمال مشرقی شام میں فوجی کارروائیوں کے بعد عمل میں آیا تھا۔