غزہ پر حملے کی واشنگٹن کو اطلاع تھی:صہیونی میڈیا

?️ 21 نومبر 2025

غزہ پر حملے کی واشنگٹن کو اطلاع تھی:صہیونی میڈیا

 اسرائیلی ٹیلی وژن نے اپنی ایک رپورٹ میں دعویٰ کیا ہے کہ غزہ پٹی پر بدھ کے روز کیے گئے اسرائیلی حملوں کے بارے میں واشنگٹن کو پیشگی اطلاع دی گئی تھی۔

الجزیرہ کے مطابق، اسرائیلی فوجی ریڈیو نے بھی کہا ہے کہ غزہ شہر کے محلے زیتون میں کی جانے والی کارروائی کا ہدف حماس کے فوجی کمانڈروں کا ایک مبینہ اجلاس تھا۔ رپورٹ میں مزید دعویٰ کیا گیا کہ اس حملے میں حماس کے زیتون بریگیڈ اور بحری یونٹ کے کمانڈروں کو نشانہ بنایا گیا۔

قبل ازیں، اسرائیلی فوج نے اعلان کیا تھا کہ وہ خان یونس کے علاقے میں اپنے اہلکاروں پر حملے کے جواب میں غزہ پٹی کے مختلف حصوں پر حملے کر رہی ہے۔ عبری نیوز ویب سائٹ  نے بھی دعویٰ کیا کہ اسرائیلی فضائیہ نے غزہ شہر میں ایک عمارت پر حملہ کر کے القسام بریگیڈ کے ایک عہدیدار کو نشانہ بنایا۔

دوسری جانب، فلسطین کی وزارتِ صحت کے مطابق اسرائیلی حملوں میں بدھ کے روز کم از کم 25 عام شہری شہید اور 77 زخمی ہوئے۔ وزارت کا کہنا ہے کہ اسرائیلی بمباری شجاعیہ، زیتون اور خان یونس کے علاقوں میں شدید رہی۔ زیتون محلے میں ایک ہی خاندان کے پانچ افراد جاں بحق ہوگئے۔

یاد رہے کہ اسرائیل نے 7 اکتوبر 2023 کو غزہ پر جنگ مسلط کی تھی جس کا مقصد حماس کو ختم کرنا اور اسرائیلی قیدیوں کی بازیابی بتایا گیا تھا، تاہم تل ابیب اپنے اہداف حاصل کرنے میں ناکام رہا اور بالآخر اسے حماس کے ساتھ قیدیوں کے تبادلے سے متعلق معاہدے پر آمادہ ہونا پڑا۔

حماس نے 17 اکتوبر 2025 کو جنگ کے خاتمے اور قیدیوں کے تبادلے کے معاہدے کی باضابطہ تصدیق کی، جس کے بعد 18 اکتوبر کو اسرائیلی فوج نے اعلان کیا کہ غزہ میں جنگ بندی نافذ ہو چکی ہے۔ معاہدے کے تحت اسرائیلی فوج کچھ مخصوص علاقوں میں موجود رہے گی اور جنوبی سے شمالی غزہ تک آمدورفت کو الرشید اسٹریٹ اور صلاح الدین روڈ کے ذریعے اجازت دی گئی ہے۔

اس کے باوجود، اسرائیلی فورسز جنگ بندی کی پہلی مرحلے کی شقوں پر عمل درآمد میں رکاوٹیں ڈال رہی ہیں اور اس دوران خلاف ورزیاں بھی جاری ہیں۔