عرب ممالک متحدہ محاذ اور اسرائیل کے بائیکاٹ کی جانب بڑھ رہے ہیں:اسرائیلی میڈیا

 عرب ممالک متحدہ محاذ اور اسرائیل کے بائیکاٹ کی جانب بڑھ رہے ہیں:اسرائیلی میڈیا

 صیہونی چینل کان نے انکشاف کیا ہے کہ خلیجی عرب ممالک، قطر پر اسرائیلی حملے کے بعد، تل ابیب کے ساتھ اپنے تعلقات پر نظرِثانی اور اسرائیل کے خلاف ایک متحدہ محاذ تشکیل دینے پر غور کر رہے ہیں۔

رپورٹ کے مطابق، اسرائیلی حملے کے بعد عرب دنیا خصوصاً خلیجی ممالک میں شدید غم و غصہ پھیل گیا ہے اور اس کے نتیجے میں نئے اقدامات پر مشاورت تیز ہوگئی ہے۔

کان نے بتایا کہ عرب رہنماؤں کا ہنگامی اجلاس اتوار کے روز دوحہ میں بلایا جا رہا ہے جس میں مشترکہ موقف اختیار کرنے اور اسرائیل کے خلاف یکجہتی دکھانے پر بات چیت ہوگی۔ ایک سعودی شاہی ذریعے نے اس چینل کو بتایا کہ اجلاس میں اسرائیل پر ممکنہ پابندیاں اور تعلقات پر نظرِثانی جیسے امور ایجنڈے میں شامل ہوں گے۔

یہ پیش رفت ایسے وقت میں سامنے آئی ہے جب منگل کے روز تل ابیب نے دوحہ میں واقع حماس کے دفتر پر فضائی حملہ کیا۔ بعض میڈیا ذرائع کے مطابق، یہ کارروائی امریکا اور ڈونلڈ ٹرمپ کی ہم آہنگی سے کی گئی، تاہم اسرائیلی وزیرِاعظم کے دفتر نے دعویٰ کیا کہ آپریشن مکمل طور پر اسرائیلی تھا۔

قطر کی وزارتِ خارجہ نے اس حملے کو جرائم پر مبنی اور بزدلانہ اقدام قرار دیتے ہوئے کہا کہ رہائشی عمارتوں کو نشانہ بنانا نہ صرف بین الاقوامی قوانین کی خلاف ورزی ہے بلکہ قطر کے شہریوں اور مقیم افراد کی سلامتی کے لیے براہِ راست خطرہ بھی ہے۔