عالمی میڈیا نے ٹرمپ کی تقریرکو بے معنی اور غیر جمہوری قرار دیا

عالمی میڈیا نے ٹرمپ کی تقریرکو بے معنی اور غیر جمہوری قرار دیا

 دنیا بھر کے بڑے میڈیا اداروں نے اقوام متحدہ کی جنرل اسمبلی میں امریکی صدر ڈونلڈ ٹرمپ کی تقریر کو سخت تنقید کا نشانہ بناتے ہوئے اسے امریکہ اول پالیسی کا عکس، بے معنی، کھوکھلے دعوے اور جمہوری اقدار سے عاری قرار دیا ہے۔

سی این این نے لکھا کہ ٹرمپ نے اپنی تقریر میں جمہوری اقدار کا کوئی ذکر نہیں کیا اور نہ ہی امریکی اتحادیوں کے خدشات کو دور کرنے کے لیے کوئی اعتماد بحال کرنے والی بات کہی۔ انہوں نے اکثر آمرانہ حکومتوں کو نظرانداز کیا اور ماحولیاتی تبدیلیوں کے بارے میں ایسے دلائل دیے جو ان کے سائنسی فہم کی سطحی حالت کو ظاہر کرتے ہیں۔

رپورٹ میں مزید کہا گیا کہ ٹرمپ نے دعویٰ کیا کہ وہ دنیا کے سات تنازعات ختم کر چکے ہیں، حالانکہ ان میں سے بیشتر میں ان کی کوئی براہِ راست شمولیت ہی نہیں تھی۔ نوبل امن انعام کے حصول کی ان کی خواہش بھی اسی تناظر میں سامنے آئی۔

خبر رساں ادارہ فرانس (AFP) نے یاد دلایا کہ 2018 میں اقوام متحدہ میں ٹرمپ کی پہلی تقریر پر عالمی رہنما ہنس پڑے تھے، لیکن اس بار ان کی تند و تیز تقریر کو خاموشی سے سنا گیا۔

ایسوسی ایٹڈ پریس (AP) نے لکھا کہ دوبارہ صدر منتخب ہونے کے بعد اپنی پہلی تقریر میں ٹرمپ نے کوئی رعایت نہیں دی اور امریکہ اول کے نعرے پر قائم رہے۔ انہوں نے کہا کہ امریکہ کے پاس سب سے مضبوط فوج، بہترین معیشت اور سنہری دور ہے۔ ساتھ ہی انہوں نے اقوام متحدہ کو بے فائدہ قرار دیتے ہوئے یہاں تک کہا کہ یہ ادارہ کھوکھلے الفاظ سے بھرا ہوا ہے جو جنگوں کو ختم نہیں کر سکتے۔

ٹرمپ نے اپنے آپ کو امن پسند رہنما کے طور پر پیش کرنے کی کوشش کی، مگر اسی دوران ایران اور وینیزویلا پر فوجی حملے کی دھمکی بھی دے ڈالی۔

رائٹرز کے مطابق، یورپی طاقتیں کئی ماہ سے امریکہ کے ساتھ تعلقات کو بہتر بنانے اور یوکرین جنگ کے خاتمے کے لیے واشنگٹن کی حمایت حاصل کرنے کی کوشش کر رہی تھیں۔ لیکن ٹرمپ نے اپنی تقریر میں نیٹو اتحادیوں کو روسی تیل کی خریداری پر طنز کا نشانہ بنایا اور ماسکو کے خلاف سخت معاشی اقدامات کی دھمکی دی۔