صیہونیوں کی براہ راست فائرنگ سے ایک ہفتے میں 9 فلسطینی شہید

🗓️ 17 جنوری 2023

سچ خبریں:صیہونی فوج کے ہاتھوں گزشتہ ایک ہفتے کے دوران کم سے کم 9 فلسطینی شہری شہید ہو چکے ہیں۔

گذشتہ ایک ہفتے کے دوران مقبوضہ فلسطین کے مختلف علاقوں میں صہیونی فوج کے ہاتھوں کم سے کم 9 فلسطینی شہری شہید ہوچکے ہیں، مڈل ایسٹ آئی کی رپورٹ کے مطابق مقبوضہ مغربی کنارے کے شہر سلواد کے قریب "احمد حسن کحلہ” نامی فلسطینی کی شہادت کے بعد ایک ہفتے کے دوران فلسطینی شہداء کی تعداد 9 ہو گئی۔

یاد رہے کہ مقبوضہ علاقوں میں صیہونی فوجیوں کی جانب سے فلسطینیوں کو مارنے کے لیے گولیاں چلانا ایک معمول بن چکا ہے، اے ایف پی کے ایک رپورٹر نے بتایا کہ اتوار کے روز درجنوں فلسطینیوں نے 45 سالہ احمد حسن کحلہ کے جنازے میں شرکت کی اور صیہونیوں کے خلاف نعرے لگاتے ہوئے اس شہید کے خون کا بدلہ لینے کا مطالبہ کیا۔

فلسطینی وزارت خارجہ نے کہا ہے کہ نئی تل ابیب کی دائیں بازو کی اور انتہاپسند نئی کابینہ نے صیہونی فوجیوں کے لیے فلسطینیوں کو قتل کرنا آسان بنا دیا ہے جس میں نہ تو کوئی عدالتی کارروائی کی جاتی ہے اور نہ ہی عدالتی حکام اس سلسلہ میں کسی سے تفتیش کرتے ہیں۔

یاد رہے کہ رواں سال کے آغاز سے لے کر اب تک صیہونی قابض فوج نے مشرقی بیت المقدس اور مغربی کنارے میں تین بچوں سمیت 13 فلسطینیوں کو شہید کیا ہے،اس کے علاوہ گزشتہ سال مقبوضہ فلسطینی علاقوں میں کم از کم 167 افراد مارے گئے تھے جو دوسرے انتفاضہ کے بعد ہونے والی ہلاکتوں کی سب سے زیادہ تعداد ہے۔