شہید سید حسن نصراللہؒ کی تدفین پر بمباری کی تجویز کس نے دی؟ صہیونی صحافی کا انکشاف

?️ 15 دسمبر 2025

شہید سید حسن نصراللہؒ کی تدفین پر بمباری کی تجویز کس نے دی؟ صہیونی صحافی کا انکشاف

اسرائیل کے چینل 14 کے سیاسی صحافی تامیر موراگ نے انکشاف کیا ہے کہ لبنان میں حزب اللہ کے شہید سربراہ سید حسن نصراللہؒ کی تدفین کے موقع پر ہونے والی عظیم الشان تقریب کو نشانہ بنانے کی تجویز ایک امریکی اہلکار نے دی تھی۔

 ایک ٹی وی پروگرام میں گفتگو کرتے ہوئے تامیر موراگ نے کہا کہ مورگن اورٹاگوس، جو لبنان کے لیے امریکا کی خصوصی نمائندہ ہیں، نے اسرائیلی حکام کو مشورہ دیا تھا کہ بیروت کے اسپورٹس اسٹیڈیم میں منعقد ہونے والی تدفینی تقریب پر حملہ کیا جائے، جہاں لاکھوں لبنانی شہری شریک تھے۔

موراگ کے مطابق، امریکی نمائندہ کا مؤقف یہ تھا کہ اس تقریب میں لبنان کی مزاحمتی قیادت کے کئی اعلیٰ عہدیدار بھی موجود ہوں گے، اس لیے یہ ایک “اہم ہدف” ہو سکتا ہے۔ انہوں نے بتایا کہ یہ تجویز اورٹاگوس نے تدفین سے کچھ ہی دن قبل اپنے دورۂ مقبوضہ فلسطین کے دوران پیش کی تھی۔

اسرائیلی صحافی کے مطابق، اسرائیلی فریق نے اس انتہائی خطرناک تجویز کو مسترد کر دیا اور براہِ راست حملے کے بجائے صرف جنگی طیاروں کی تدفینی اجتماع کے اوپر پرواز تک خود کو محدود رکھا۔

قابل ذکر بات یہ ہے کہ تامیر موراگ اس سے قبل بھی ایک ٹی وی انٹرویو میں انکشاف کر چکے تھے کہ امریکی انتظامیہ کے ایک اہلکار نے اسی نوعیت کی تجویز دی تھی، تاہم اس وقت انہوں نے کسی کا نام ظاہر نہیں کیا تھا۔ اب پہلی مرتبہ انہوں نے واضح طور پر مورگن اورٹاگوس کا نام لیا ہے۔

یہ انکشاف ایسے وقت میں سامنے آیا ہے جب خطے میں امریکا اور اسرائیل کے کردار پر شدید تنقید کی جا رہی ہے اور شہری اجتماعات کو نشانہ بنانے کی تجاویز نے ایک بار پھر سنگین اخلاقی اور قانونی سوالات کو جنم دے دیا ہے۔