سیاسی دباؤ کے درمیان ٹرمپ کے یوکرین مذاکرات سے دستبردار ہونے کا امکان 

سچ خبریں:امریکی جریدے دی اٹلانٹک کی رپورٹ کے مطابق، ڈونلڈ ٹرمپ کی انتظامیہ آنے والے انتخابی مہم کے سیاسی تقاضوں کے پیش نظر یوکرین امن مذاکرات سے علیحدگی اختیار کر سکتی ہے۔

جریدے کے مطابق آنے والے ہفتوں میں ٹرمپ کی توجہ انتخابی مہم پر مرکوز ہوگی، ایسے میں وہ یوکرین مذاکرات کو سیاسی طور پر غیر مفید سمجھ کر ان سے دوری اختیار کر سکتے ہیں۔ رپورٹ میں مزید کہا گیا ہے کہ مذاکرات کی ناکامی کی صورت میں ٹرمپ سفارتی عمل میں ناکامی کا ذمہ دار تنازع کے کسی ایک یا دونوں فریقوں کو ٹھہرا سکتے ہیں۔

دوسری جانب یوکرینی ذرائع کا کہنا ہے کہ کیف بحران کے حل کیلئے مذاکراتی عمل کو تیز کرنے کے پیش نظر ماسکو میں براہ راست مذاکراتی وفد بھیجنے کے آپشن پر غور کر رہا ہے، یہ اقدام ممکنہ طور پر مذاکراتی سمت میں تبدیلی کا اشارہ ہے۔

واضح رہے کہ یوکرین بحران پر سہ فریقی مذاکرات کا دوسرا دور ماہِ جاری کی ابتدا میں ابوظبی میں روس، امریکہ اور یوکرین کے نمائندوں کی شرکت میں منعقد ہوا تھا۔

روس اور یوکرین کے درمیان جنگ کے خاتمے کیلئے مذاکرات کا سلسلہ 2022 سے جاری ہے تاہم حالیہ مہینوں میں سفارتی کوششوں کے باوجود اب تک کوئی جامع اور پائیدار معاہدہ طے نہیں پایا ہے۔