سچ خبریں:یمنی وزیر صحت نے ایک تقریر میں زور دے کر کہا کہ سعودی جارحیت پسند جنگی طیاروں نے جان بوجھ کراس ملک کے 500 سے زیادہ اسپتالوں اور طبی مراکز کو تباہ کردیا ہے۔
المسیرہ نیوز ایجنسی کی رپورٹ کے مطابق یمن کے وزیر صحت طه المتوکل نے جمعہ کےروز ملک میں سعودی جارحیت پسند جنگی طیاروں کے جرائم کا حوالہ دیتے ہوئے کہا کہ سعودی جان بوجھ کر یمنی طبی مراکز کو نشانہ بنارہے ہیں،یمنی وزیر صحت نے یاد دلایا گذشتہ عرصہ کے دوران سعودیوں نے 43000 سے زیادہ یمنیوں کو شہید اور زخمی کیا ہے،یادرہے کہ یمن میں سعودی عرب کے جرائم امریکہ اور مغربی ممالک کی مسلسل حمایت سے انجام دیئے جارہے ہیں نیز یمنی عوام کا ہر طرف سے محاصرہ اسی غیر ملکی حمایت کے تحت جاری ہے،یمنی وزیر صحت نے پہلے بھی کہا تھا کہ رہائشی علاقوں سمیت یمن کے مختلف علاقوں پر سعودی عرب کے وحشیانہ حملے جاری ہیں اور رکے نہیں ہیں۔
انھوں نے مزید کہا کہ جو شخص سعودی بم دھماکوں میں ہلاک نہیں ہوا وہ دوائیوں کی کمی کی وجہ سے ہلاک ہوجائے گا، یہ ایک جنگی جرم ہے جس نے محاصرے کے ذریعے یمن میں ادویات کی قلت پیدا کردی ہے، یمنی وزیر صحت نے مزید کہاکہ سعودی جارحیت پسند اتحادنے بے ہوشی کی دواؤں کی درآمد کو روک رکھا ہے جو صحت اور علاج کے شعبے میں بنیادی اورلازمی ضروریات میں شامل ہیں۔
واضح رہے کہ سعودی جارح اتحاد نے پچھلے چھ سال سے یمن کے مظلوم عوام پر ہر طرح کے مظالم روا رکھے ہوئے ہیں یہاں تک کہ اب انھیں بمباری کرنے کے لیےپہلے جگہ تلاش کرنا پڑتی ہے جبکہ اقوام متحدہ سمیت عالمی برادری کو ٹس سے مس نہیں بلکہ اقوام متحدہ نے الٹا جارحین کا ساتھ دیتے ہوئے سعودی عرب کا نام بچوں کے حقوق پائمال کرنے والے ممالک کی فہرست سے نکال دیا۔
