دنیا فلسطین کو ریاست تسلیم کر رہی ہے، یہ عمل اب ناقابلِ واپسی ہے

دنیا فلسطین کو ریاست تسلیم کر رہی ہے، یہ عمل اب ناقابلِ واپسی ہے

 عرب لیگ کے سابق سیکرٹری جنرل عمرو موسی نے کہا ہے کہ دنیا فلسطین کو ایک آزاد ریاست کی صورت میں تسلیم کرنے کی سمت بڑھ رہی ہے اور یہ عمل اب واپس نہیں لوٹ سکتا۔

انہوں نے ایک مصری ٹی وی پروگرام میں گفتگو کرتے ہوئے برطانیہ کی جانب سے فلسطین کو باضابطہ ریاست تسلیم کرنے کے اعلان کو برطانیہ کی پالیسی میں اصلاح اور فلسطینی مسئلے کے حل کی نئی شروعات‘قرار دیا۔ عمرو موسی کے بقول اس فیصلے کی اہمیت اس لیے بھی زیادہ ہے کہ خود برطانیہ ہی نے ایک صدی قبل اعلان بالفور کے ذریعے یہ بحران پیدا کیا تھا۔

عمرو موسی نے اسرائیلی وزیراعظم بنیامین نیتن یاہو کے اس بیان کو کہ فلسطینی ریاست کبھی تشکیل نہیں پائے گی رد کرتے ہوئے کہا کہ دنیا کی اکثریت فلسطین کو تسلیم کر رہی ہے اور چار مستقل رکن ممالک سلامتی کونسل بھی اس کی تائید کر چکے ہیں۔

انہوں نے واضح کیا کہ اب تک ۸۰ فیصد ممالک فلسطین کو تسلیم کر چکے ہیں اور برطانیہ کا فیصلہ نہ صرف تاریخی اہمیت رکھتا ہے بلکہ عالمی سطح پر اسرائیل کی پالیسیوں کے خلاف ایک نئے سیاسی رجحان کا آغاز ہے۔

سابق سیکرٹری جنرل عرب لیگ نے مزید کہا کہ کینیڈا، آسٹریلیا، اسپین اور آئرلینڈ جیسے ممالک کے اقدامات، دیگر ملکوں کے لیے بھی راہ ہموار کریں گے۔ ان کے مطابق، فلسطین کا مسئلہ آج بھی زندہ ہے اور خطے پر اثرانداز ہو رہا ہے۔

عمرو موسی نے خطے کی نئی سیاسی صف بندیوں کا ذکر کرتے ہوئے کہا کہ عرب ممالک، خصوصاً خلیجی ریاستیں، نئے اتحادیوں کی تلاش میں ہیں تاکہ اسرائیلی تجاوزات اور علاقائی عدم استحکام کے خلاف اپنے مفادات کا تحفظ کر سکیں۔

انہوں نے اسرائیلی تحریکوں اور بعض امریکی میڈیا رپورٹس کو سیاسی جنگ کا حصہ قرار دیتے ہوئے کہا کہ اصل توجہ اس بات پر ہونی چاہیے کہ تنازعات کو سیاسی طور پر کیسے حل کیا جائے، نہ کہ جنگ کی بات کر کے خطے کو مزید عدم استحکام کی طرف دھکیلا جائے۔