جن جگہوں پر اسرائیل نے حملے کئے تھے وہاں ہمارے قائدین موجود نہیں تھے

جن جگہوں پر اسرائیل نے حملے کئے تھے وہاں ہمارے قائدین موجود نہیں تھے

یمن کی انصاراللہ تحریک کے سینئر رہنما محمد البخیتی نے واضح کیا ہے کہ اسرائیلی فضائی حملے صنعا میں ان مقامات پر کیے گئے جہاں انصاراللہ کی قیادت موجود ہی نہیں تھی۔

محمد البخیتی نے کہا کہ یہ حملے کسی صورت بھی غزہ میں ہماراسرے بھائیوں کی حمایت پر اثرانداز نہیں ہوں گے۔ ان کے بقول، جب تک غزہ پر صہیونی جارحیت جاری ہے، یمن کی عسکری کارروائیاں بھی جاری رہیں گی۔

انہوں نے مزید کہا کہ انصاراللہ ایک طویل اور سخت جنگ کے لیے تیار ہے اور اسرائیل کے ساتھ براہِ راست مقابلے پر خوش ہے۔ ہم صہیونی رژیم کو شدید اور تکلیف دہ ضربیں لگا رہے ہیں اور غزہ میں جاری نسل کشی پر کبھی خاموش نہیں رہیں گے۔

ذرائع کے مطابق، اسرائیلی فوج نے صنعا پر متعدد فضائی حملے کیے جن کے بعد شہر میں مسلسل دھماکوں کی آوازیں سنائی دیتی رہیں۔ المیادین کے نامہ نگار نے اطلاع دی ہے کہ 10 سے زائد حملے صنعا کے مختلف مقامات پر کیے گئے۔

خبروں کے مطابق، اسرائیلی نیوی نے بھی اس جارحیت میں حصہ لیا، جبکہ ریڈیو آرمی نے دعویٰ کیا کہ نشانہ بننے والی عمارتوں میں انصاراللہ کے رہنما موجود تھے۔

یاد رہے کہ چند روز قبل بھی اسرائیلی جنگی طیاروں نے صنعا کے شہری علاقوں کو نشانہ بنایا تھا۔ آج کے حملوں کے بعد بھی صہیونی میڈیا نے یہ دعویٰ کیا ہے کہ اس نے یمن کے وزیر دفاع، وزیر داخلہ اور آرمی چیف کو ہلاک کر دیا ہے، تاہم انصاراللہ کی جانب سے ان دعووں کو مسترد کر دیا گیا ہے۔