جرائم کے خلاف کاروائی کے بہانے ٹرمپ کی شکاگو پر فوجی یلغار

امریکی صدر ڈونلڈ ٹرمپ نے جرائم اور غیرقانونی تارکین وطن کے خلاف کارروائی کے نام پر ایک اور متنازع اقدام اٹھاتے ہوئے شکاگو میں فوجی دستے بھیجنے کا عندیہ دیا ہے۔ اس سے قبل وہ لاس اینجلس اور واشنگٹن میں بھی وفاقی فورسز تعینات کر چکے ہیں۔

امریکی روزنامہ واشنگٹن پوسٹ کے مطابق، پینٹاگون گزشتہ چند ہفتوں سے مختلف آپشنز پر غور کر رہا ہے، جن میں ستمبر کے دوران ہزاروں نیشنل گارڈ کے اہلکاروں کی ممکنہ تعیناتی بھی شامل ہے۔ڈونلڈ ٹرمپ نے جمعہ کو شکاگو کو تباہ حال شہر قرار دیا اور ڈیموکریٹ قیادت پر طنز کرتے ہوئے کہا شاید اب ہم اس شہر کو بھی ٹھیک کریں گے۔

دوسری جانب الینوئے کے ڈیموکریٹ گورنر جی بی پریٹزکر نے کہا کہ وفاقی حکومت نے کسی بھی قسم کی مدد پر بات چیت نہیں کی ہے۔ انہوں نے واضح کیا کہ ریاست میں ایسی کوئی ہنگامی صورتحال موجود نہیں جو فوجی تعیناتی کو جائز قرار دے۔ گورنر کے بقول صدر ٹرمپ ایک مصنوعی بحران پیدا کرنے کی کوشش کر رہے ہیں تاکہ اپنی ناکام پالیسیوں اور عوامی مسائل سے توجہ ہٹائی جا سکے۔

شکاگو کے میئر برانڈن جانسن نے بھی شدید تشویش کا اظہار کرتے ہوئے کہا کہ نیشنل گارڈ کی "غیرقانونی تعیناتی” شہر کے لیے خطرناک ہوگی۔ انہوں نے مزید کہا: "صدر کا یہ اقدام بے بنیاد، غیرضروری اور غیرمنطقی ہے۔”

میئر کے مطابق، گزشتہ ایک سال میں شکاگو میں قتل کی وارداتوں میں 30 فیصد، مسلح ڈکیتیوں میں 35 فیصد اور فائرنگ کے واقعات میں تقریباً 40 فیصد کمی آئی ہے۔

اس سے قبل تین ریپبلکن گورنرز نے ٹرمپ کی درخواست پر واشنگٹن میں سینکڑوں نیشنل گارڈ بھیجنے کی منظوری دی تھی، حالانکہ اعدادوشمار کے مطابق دارالحکومت میں پرتشدد جرائم کی شرح گزشتہ 30 برسوں کی نچلی ترین سطح پر ہے۔

یاد رہے کہ جون میں بھی ٹرمپ نے 700 میرینز اور 4 ہزار نیشنل گارڈز کو لاس اینجلس میں تعینات کرنے کا حکم دیا تھا، جس کی ڈیموکریٹ گورنر گیون نیوزم نے مخالفت کی تھی۔ یہ اقدام اسی وقت کیا گیا جب وفاقی ایجنسیاں غیرقانونی تارکین وطن کی گرفتاری کے لیے بڑے پیمانے پر چھاپے مار رہی تھیں۔