ترک فنکاروں کی غزہ کے عوام سے اظہار یکجہتی مہم میں شرکت

ترک فنکاروں کی غزہ کے عوام سے اظہار یکجہتی مہم میں شرکت

 ترکی کے متعدد فنکاروں نے فلسطینی عوام کی حمایت میں جاری مہم اسکودار سے غزہ تک دلوں کا پل میں بھرپور شرکت کی۔ اس مہم کا مقصد غزہ کے مظلوم شہریوں کے لیے امداد اکٹھی کرنا اور عالمی سطح پر انسانی بحران کی طرف توجہ مبذول کرانا ہے۔

ترکی کی سرکاری خبر رساں ایجنسی اناضولو کے مطابق، فنکاروں نے استنبول کے ایشیائی حصے میں واقع علاقے اسکودار کا دورہ کیا جہاں دکانداروں نے اعلان کیا تھا کہ وہ جمعہ کے دن کی تمام آمدنی غزہ کے عوام کے نام وقف کریں گے۔

اس مہم کے تحت مسجد الوالدہ الجدیدہ کے صحن میں ایک خیراتی بازار بھی قائم کیا گیا ہے، جہاں شہری خریداری کے ذریعے غزہ کے عوام کی مدد کر سکتے ہیں۔

مہم کے کوآرڈینیٹر عمر فاروق سردار نے کہا کہ یہ اقدام خود دکانداروں کی درخواست پر شروع کیا گیا ہے۔ ان کے بقول، یہ سرگرمی مظلوم فلسطینیوں کے دلوں میں امید جگانے کا ذریعہ ہے اور یہ ماڈل ترکی کے دیگر علاقوں کے دکانداروں کے لیے بھی ایک مثال بن سکتا ہے۔