بشار الاسد کو قانونی حیثیت دینے کی کوشش مایوس کن تھی :امریکہ

?️ 20 مارچ 2022

سچ خبریں:امریکہ نے شام کے صدر بشار الاسد کے متحدہ عرب امارات کے دورے کو مایوس کن قرار دیا ہے۔
امریکی وزارت خارجہ کے ترجمان نڈ پرائس نے سنیچر کے روز ایک بیان میں کہا کہ ہمیں بشار اسد کو قانونی حیثیت دینے کی اس ظاہری کوشش سے گہری مایوسی ہوئی اور تکلیف پہونچی ہے۔

نڈ پرائس نے کہا کہ امریکی وزیر خارجہ اینٹونی بلنکن نے تاکید سے کہا ہے کہ ہم اسد کو دوبارہ بحال کرنے کی کوششوں کی حمایت نہیں کرتے اور نہ انکی حمایت کرتے ہیں جو شام کے ساتھ تعلقات کو معمول پر لانا چاہتے ہیں۔

یادرہے کہ شام کے صدر بشار الاسد جمعے کے روز یو اے ای پہونچے جہاں انہوں نے ابو ظہبی کے ولیعہد شیخ محمد بن زائد آل نہیان اور دوبئی کے حاکم شیخ محمد بن راشد المکتوم سے ملاقات اور گفتگو کی۔ بشار اسد کے ساتھ اپنی ملاقات میں ابو ظہبی کے ولیعہد نے شام کو عرب سکیورٹی کا بنیادی ستون قرار دیا اور کہا کہ یو اے ای شام کے ساتھ تعاون کو مضبوط بنانا چاہتا ہے ساتھ ہی انہوں نے دونوں ملکوں کے عوام میں تعلقات کو برادرانہ قرار دیا جو امریکہ کو برداشت نہیں ہوا اور اس نے مایوسی کا اظہار کیا جبکہ متحدہ عرب کے امریکہ کے ساتھ گہرے روابط ہیں۔