سچ خبریں:برطانوی حکومت کی جانب سے ٹیکسوں میں اضافے کے خلاف اس ملک کے سیکڑوں شہریوں نے حکومت کے خلاف احتجاجی مظاہرہ کیا۔
برطانیہ کے سیکڑوں مظاہرین نے پارلیمنٹ اسکوائر پر جمع ہو کر حکومت مخالف مظاہرہ کیا اور اس کی کارکردگی کے خلاف نعرے لگائے۔
برطانوی ذرائع ابلاغ کی رپورٹ کے مطابق سیکڑوں برطانوی شہریوں نے حکومت کے خلاف شدید نعرے لگائے اور عوامی زندگی پر اخراجات کا بوجھ کم کئے جانے کا مطالبہ کیا،مظاہرین نے حکومت اور حکمراں جماعت کے خلاف شدید نعرے بازی کی ، اس کے علاوہ مظاہرین نے جنگ مخالف نعرے لگاتے ہوئے عدل و انصاف کا بھی مطالبہ کیا۔
مظاہرین کا کہنا تھا کہ حکومت نے ٹیکسوں میں اضافہ کر کے غریبوں پر مزید دباؤ بڑھا دیا ہے اور حکومت بڑی بڑی کمپنیوں کو زیادہ سے زیادہ فائدہ پہنچانے کی کوشش کر رہی ہے،اس اجتماع میں یونیورسٹی کی شخصیات نے بھی شرکت کی، پروفیسر جاز نے کہا ہے کہ حکومت کے اقدامات، برطانوی عوام میں اشتعال پیدا کر رہے ہیں جبکہ چیزوں کی قیمتیں اور بل، آسمان چھو رہے ہیں اور عوام کی زندگی شدید دباؤ میں ہے اور یہ ایسی حالت میں ہے کہ برٹش پٹرولیم جیسی کمپنیوں کو عوام کی جیبوں سے بے تحاشا فائدہ پہنچ رہا ہے۔
انھوں نے کہا کہ عوام کے احتجاج سے اس بات کا پتہ چلتا ہے کہ حکومت کا رویہ بالکل درست نہیں ہے اور برطانیہ کے سینٹرل بینک نے افراط زر کی شرح پانچ فیصد اعلان کی ہے جو گذشتہ تین عشروں کی سب سے بڑی شرح ہے،واضح رہے کہ برطانوی حکومت مخالف مظاہرے اسی قسم کے اس ملک کے مختلف دیگر شہروں میں بھی ہوئے ہیں۔
