اٹلی کی ریاض کو اسلحے کی فروخت پر پابندی منسوخ

?️ 1 جون 2023

سچ خبریں:اطالوی حکومت نے اپنی کابینہ کے اجلاس کے بعد ایک بیان میں اعلان کیا کہ اس ملک نے سعودی عرب کو ہتھیاروں کی فروخت پر عائد پابندیاں منسوخ کر دی ہیں۔

ایسے وقت میں جبکہ یمن کے خلاف سعودی عرب کی مسلط کردہ جنگ کے خاتمے کے لیے مذاکرات اور سیاسی حل کے عمل میں تیزی آرہی ہے، بعض ممالک ریاض کو ہتھیاروں کی فروخت پر پابندی بھی منسوخ کر رہے ہیں۔

اس سلسلے میں اطالوی حکومت نے بدھ کی شام کابینہ کے اجلاس کے بعد ایک بیان میں اعلان کیا کہ اس ملک نے سعودی عرب کو ہتھیاروں کی فروخت پر عائد پابندیاں منسوخ کر دی ہیں۔

یاد رہے کہ اس سے قبل سعودی عرب نے ایک بار پھر یمن میں جامع اور پائیدار سیاسی حل کے حصول کے لیے اقوام متحدہ کے ایلچی کی کوششوں کی حمایت پر زور دیا تھا۔

روئٹرز خبر رساں ادارے کے مطابق اطالوی حکومت نے 2019 اور 2020 میں سعودی عرب کو فوجی سازوسامان کی برآمد محدود کر دی تھی تاکہ انہیں یمنی عوام کے خلاف جنگ میں استعمال ہونے سے روکا جا سکے۔

اس بیان میں اطالوی حکومت نے اس تنازعے کے خاتمے کے لیے سعودی عرب کے حالیہ مؤقف کو سراہتے ہوئے کہا ہے کہ میدان جنگ کی صورت حال میں تبدیلی کی وجہ سے ریاض کو ہتھیاروں کی فروخت پر پابندی کی اب ضرورت نہیں رہی۔

روئٹرز کے مطابق اٹلی نے یہ بھی وضاحت کی کہ سعودی عرب کے بارے میں اس کا نیا فیصلہ گزشتہ ماہ یمن جنگ میں شامل متحدہ عرب امارات کو ہتھیاروں کی فروخت پر عائد پابندی کے خاتمے جیسا ہے۔