انسانی حقوق کے امریکی کھوکھلے دعوے:ایرانی عہدہ دار

🗓️ 5 جولائی 2022

سچ خبریں:مذہبی اقلیتوں کے امور میں صدر ایران سید ابراہیم رئیسی کے مشیر کا کہنا ہے کہ امریکہ کا ہمیشہ سے یہ شیوا رہا ہے کہ وہ خود کو انسانی حقوق کے مدافع کے طور پر پیش کرتا ہے جبکہ خود انسانی حقوق کی پامالی کا مرتکب ہوتا ہے
مذہبی اقلیتوں کے امور میں صدر ایران سید ابراہیم رئیسی کے مشیر عبد السلام نے "قائد انقلاب اسلامی کے نقطہ نظر سے امریکی انسانی حقوق” عنوان کے تحت منعقدہ ایک بین الاقوامی کانفرنس میں کہا کہ امریکہ کا ہمیشہ سے یہ شیوا رہا ہے کہ وہ خود کو انسانی حقوق کے مدافع کے طور پر پیش کرتا ہے جبکہ خود انسانی حقوق کی پامالی کا مرتکب ہوتا ہے لہذا سب پر لازمی ہے کہ امریکی حکمرانوں کے خبیث اور بے رحم چہرے سے نقاب الٹ دیں۔

عبد السلام نے مزید کہا کہ امریکہ بات تو انسانی حقوق کی کرتا ہے مگر انسانی حقوق کی پامالی کے سوا اس ملک کی طرف سے کچھ اور سامنے نہ آیا، دکھاوے کے لئے انسانی حقوق کی باتیں کرتا ہے مگر اندرون خانہ بھی اسکے برخلاف عمل کرتا ہے۔

مذہبی اقلیتوں کے امور میں صدر ایران کے مشیر نے کہا کہ حکومت کی تشکیل سے تمام انبیاء کا مقصد عدل و انصاف کا قیام تھا جبکہ آج دنیا میں مغربی ممالک جو کچھ کر رہے ہیں وہ سوائے ظلم و نا انصافی کے اور کچھ نہیں ہے۔

قابل ذکر ہے کہ ایران کی تاریخ میں امریکہ کے بعض سنگین جرائم کے باعث ستائیس جون سے تین جولائی تک امریکی حقوقِ انسانی کا نام دیا گیا ہے جس کے دوران امریکہ کے مجرمانہ چہرے کو بے نقاب کرنے کے لئے خصوصی کاوشیں کی جاتی ہے۔