امریکی کانگریس میں اسرائیلی لابی کا اثر کمزور ہو رہا ہے:ٹرمپ

?️ 17 دسمبر 2025

امریکی کانگریس میں اسرائیلی لابی کا اثر کمزور ہو رہا ہے:ٹرمپ

امریکی صدر ڈونلڈ ٹرمپ نے وائٹ ہاؤس میں حنوکا کی تقریب کے دوران کہا ہے کہ امریکی کانگریس میں اسرائیل اور یہودی لابی کا اثر و رسوخ ماضی کے مقابلے میں کم ہو رہا ہے۔ انہوں نے اس صورتحال پر تشویش کا اظہار کرتے ہوئے کہا کہ کانگریس میں یہودی مخالف رجحانات بڑھ رہے ہیں اور اس حوالے سے محتاط رہنے کی ضرورت ہے۔

ٹرمپ کا کہنا تھا کہ ایک دہائی یا اس سے کچھ پہلے واشنگٹن میں سب سے طاقتور لابی اسرائیل اور یہودی برادری کی سمجھی جاتی تھی، تاہم اب حالات بدل چکے ہیں۔ انہوں نے چند ڈیموکریٹ اراکین کانگریس پر اسرائیل مخالف اور یہودیوں سے نفرت کا الزام لگایا اور کہا کہ پس پردہ بات چیت میں انہیں اس رویے کی جھلک نظر آتی ہے۔

ٹرمپ نے یہ بھی کہا کہ سینیٹ میں یہ رجحان نسبتاً کم ہے مگر وہاں بھی اس کی شروعات ہو چکی ہیں۔ اپنی گفتگو کے دوران انہوں نے آسٹریلیا کے شہر سڈنی میں یہودیوں کی ایک تقریب پر حملے کا حوالہ دیتے ہوئے حاضرین کو ہوشیار رہنے کی تلقین کی۔ ٹرمپ نے حسبِ معمول اپنی تقریر میں مختلف موضوعات کا ذکر کیا، جن میں وائٹ ہاؤس میں ایک نئے بال روم کی تعمیر اور سابق صدر جو بائیڈن پر طنزیہ تبصرہ بھی شامل تھا، اور کہا کہ میڈیا ان کی کسی لغزش کا انتظار کرتا رہتا ہے۔