سچ خبریں:فلسطینی عوام کی حمایت کی عالمی تحریک کی حمایت کرتے ہوئے الجزائر کے ایک کھلاڑی نے فلسطین کے مقبوضہ علاقوں کا سفر کرنے سے انکار کر دیا۔
مرکزاطلاعات فلسطین کے مطابق الجزائر کے ایک کھلاڑی نے مقبوضہ فلسطینی علاقوں کا سفر کرنے سے انکار کردیا، اس سلسلے میں کہا گیا ہے کہ الجزائر کی قومی فٹ بال ٹیم کے کھلاڑی احمد توبہ نے فلسطینی قوم کی حمایت اور یروشلم کی غاصب حکومت کے ساتھ تعلقات کو معمول پر لانے کی مخالفت کی علامت کے طور پر مقبوضہ فلسطین کا سفر اور صیہونی اسپورٹس ٹیم کے ساتھ مقابلے سے دستبردار ہونے کا اعلان کیا ہے۔
بتایا گیا ہے کہ الجزائری کھلاڑی کے اس اقدام کا فلسطینی حامیوں کی جانب سے خیر مقدم کیا گیا جبکہ صہیونیوں میں شدید غصہ پھیل گیا، یاد رہے کہ اس سے قبل صیہونی حکومت کے وزیر سلامتی کے سابق مشیر ایتان ڈانگوٹے نے اعتراف کیا تھا کہ عرب اقوام ہمارے ساتھ تعلقات کو معمول پر لانے کے خلاف ہیں۔
انہوں نے عرب ممالک کے سلسلے میں عسکری شعبوں میں کام کرنے کی اپنی 30 سالہ تاریخ کا ذکر کرتے ہوئے کہا کہ ہم نے بعض عرب ممالک جیسے بحرین، متحدہ عرب امارات اور مراکش کی سکیورٹی سروسز کے ساتھ ملاقاتوں کا منصوبہ بنایا ہے اور تعاون کا اہتمام کیا ہے، تاہم مشکل یہ ہے کہ ان ممالک میں ایسی قومیں ہیں جو اسرائیل کے ساتھ تعلقات کو معمول پر لانے کے خلاف ہیں، ہمیں مصر اور اردن کے حوالے سے بھی ایسی ہی پریشانی کا سامنا ہے۔