اقوام متحدہ کی خصوصی نمائندہ کا انتباہ: فلسطینی زمینوں پر قبضہ جارحانہ اقدام ہے

اقوام متحدہ کی خصوصی نمائندہ کا انتباہ: فلسطینی زمینوں پر قبضہ جارحانہ اقدام ہے

اقوام متحدہ کی خصوصی نمائندہ برائے انسانی حقوق، فرانچسکا آلبانیز نے مقبوضہ فلسطینی علاقوں میں اسرائیل کی جانب سے زمینوں کی ضبطی اور توسیعی اقدامات کی سخت مذمت کرتے ہوئے کہا ہے کہ یہ کارروائیاں بین الاقوامی قانون کے تحت جارحیت کے مترادف ہو سکتی ہیں۔

انہوں نے کہا کہ مغربی کنارے سے متعلق حالیہ اقدامات محض انتظامی اصلاحات نہیں بلکہ فلسطینی علاقوں کے مستقل اور عملی الحاق کو مضبوط بنانے کی دانستہ کوشش ہیں۔ ان کے مطابق یہ سب کچھ عالمی برادری کی موجودگی میں ہو رہا ہے جبکہ ذمہ دار عناصر احتساب سے بچے ہوئے ہیں۔

خصوصی نمائندہ نے خبردار کیا کہ فلسطینی اراضی کا الحاق بین الاقوامی قانون کی کھلی خلاف ورزی ہے اور اس پالیسی کا تسلسل منصفانہ اور پائیدار حل کے امکانات کو مزید کمزور کرے گا۔

دوسری جانب فرانس کے وزیر خارجہ ژاں نوئل بارو نے ان کے بیانات پر تنقید کرتے ہوئے انہیں قابل مذمت قرار دیا اور استعفے کا مطالبہ کیا۔

اس کے جواب میں آلبانیز نے ایک انٹرویو میں کہا کہ وہ ممالک جو خود بین الاقوامی قوانین کی خلاف ورزی کرتے ہیں اور نسل کشی کی مذمت نہیں کرتے، انہیں انہیں سبق دینے کا کوئی حق نہیں۔ انہوں نے زور دیا کہ توجہ ان کی ذات کے بجائے ان رپورٹس کے مواد پر مرکوز ہونی چاہیے جن میں اسرائیلی خلاف ورزیوں کی نشاندہی کی گئی ہے۔

انہوں نے مزید کہا کہ غزہ اور مغربی کنارے کی صورت حال پر مؤقف اختیار کرنے کے بعد انہیں کردار کشی کی مہم کا سامنا ہے، تاہم وہ اپنے موقف پر قائم ہیں۔