اقوام متحدہ اسرائیل کو روکے: لبنان

?️ 25 فروری 2022

سچ خبریں:لبنانی صدر نے UNFIL کے کمانڈر کے ساتھ ملاقات میں کہا کہ اقوام متحدہ کو لبنان پر اسرائیلی جارحیت روکنے کے لیے دباؤ ڈالنا چاہیے۔
النشرہ نیوز چینل کی رپورٹ کے مطابق لبنان کے صدر میشل عون نے اقوام متحدہ کی امن فوج (UNIFEL)کے کمانڈر سٹیفانو ڈیل کول سے ملاقات کے دوران ان کے مشن کے اختتام کے موقع پر انہیں لبنانی نیشنل سروس میڈل پیش کیا۔

رپورٹ کے مطابق عون نے ملاقات کے دوران کہا کہ وہ صیہونی حکومت کی جانب سے لبنان کی خودمختاری کی خلاف ورزی کرنے پر شدید مذمت کرتے ہیں اور اقوام متحدہ کو صیہونی حکومت پر دباؤ ڈال کر ان اقدامات کو ختم کرنا چاہیے، میشل عون نے بین الاقوامی قوانین اور چارٹر کے مطابق لبنان کے زمینی، سمندری اور فضائی حقوق اور خودمختاری پر زور دیا۔

واضح رہے کہ صیہونی حکومت نے شام کی سرزمین کو نشانہ بنانے کے لیے بارہا لبنانی فضائی حدود کا استعمال کیا ہے جبکہ لبنان نے کئی بار اقوام متحدہ میں صیہونی حکومت کے خلاف اس مسئلے کی شکایت کی ہے۔

قابل ذکر ہے کہ لبنان کی فضائی ، زمینی اور سمندری حدود میں بار بار صیہونی تجاوزات سلامتی کونسل کی قرارداد 1701 کی صریح خلاف ورزی ہے جو 2006 کی 33 روزہ جنگ کے خاتمے کے لیے جاری کی گئی تھی، لبنان میں مقیم اقوام متحدہ کے امن دستوں نے بارہا اطلاع دی ہے کہ صیہونی حکومت روزانہ کی بنیاد پر اقوام متحدہ کی قراردادوں کی خلاف ورزی کرتی ہے اور لبنان کی فضائی حدود کی خلاف ورزی کرتی ہے۔